Qazaqstanda mektep mańyndaǵy meshitter súrilmeıdi
Qoǵamdyq damý mınıstrliginiń Qoǵamdyq kelisim komıteti 2018 jylǵy 2 tamyzda BAQ betterinde jaryq kórgen Qazaqstanda mektepke jaqyn ornalasqan meshitter súriledi degen aqparattyń shyndyqqa janaspaıtynyn habarlaıdy.
Óıtkeni elimizde 2018 jylǵy sáýir aıynda 300 metr aýmaqta ornalasqan barlyq meshitterdi buzatyn ereje nemese dinı ǵımarattardyń qurylysyn reglamentteıtin jańa normalar qabyldanǵan joq.
Osy jerde túsinispeýshiliktiń týyndaǵany anyq. Qazirgi ýaqytta, qoldanystaǵy zaǵnamalarǵa muqııat úńilip qaraıtyn bolsaq BAQ betterinde jarııalanǵan aqparattyń bir-birinen alshaq ketip jatqanyn anyqtaýǵa bolady.
Qazaqstan Respýblıkasy Din isteri jáne azamattyq qoǵam mınıstriniń 2017 jylǵy 9 maýsymdaǵy № 89 buıryǵymen bekitilgen «Dinı ádebıetti jáne dinı mazmundaǵy ózge de aqparattyq materıaldardy, dinı maqsattaǵy zattardy taratý úshin arnaıy statsıonarlyq úı-jaılardyń, sondaı-aq ǵıbadat úılerinen (ǵımarattarynan) tys jerlerde dinı is-sharalardy ótkizýge arnalǵan úı-jaılardyń ornalastyrylýyn aıqyndaý jónindegi» Nusqaýlyqtyń 7-tarmaǵyna sáıkes, dinı is-sharalardy ótkizýge arnalǵan úı-jaı temir jol jáne avtovokzaldardy, áýejaılar men porttardy qospaǵanda, osy Nusqaýlyqtyń 5-tarmaǵynyń 3) tarmaqshasynda kórsetilgen aýmaqtar men ǵımarattardan (olarǵa irgeles aýmaqtar bolmaǵan jaǵdaıda) 300 metrden kem emes qashyqtyqta ornalastyrylady dep kórsetilgen.
Bul talap saýda ortalyqtarynyń ishinde, áýejaı, saparjaı jáne temir jol vokzaldarynda ornalasqan, dinı qulshylyqty oryndaýǵa arnalǵan ǵıbadat etý bólmelerine qatysty.
Al, meshitter nemese basqa da dinı birlestikterge tıesli dinı ǵımarattar úshin joǵarydaǵy talaptar qoıylmaıdy.
Bul jaǵdaı basqa normalarmen retteledi.
Atap aıtqanda, ǵıbadat úılerin salý Qazaqstan Respýblıkasy Mádenıet jáne sport mınıstriniń 2015 jylǵy 23 sáýirdegi № 147 buıryǵymen bekitilgen «Ǵıbadat úılerin (ǵımarattaryn) salý jáne olardyń ornalasatyn jerin aıqyndaý týraly sheshim berý» memlekettik kórsetiletin qyzmet standartymen retteledi jáne osy standartta 300 metrge qatysty eshqandaı talap qoıylmaǵan.
Joǵaryda bekitilgen standartqa sáıkes talap etiletin qajetti qujattar tizbesi:
1) osy memlekettik kórsetiletin qyzmet standartyna 1-qosymshaǵa sáıkes nysan boıynsha ótinish;
2) jeke tulǵalar úshin – jeke basyn kýálandyratyn qujattyń kóshirmesi nemese zańdy tulǵalar úshin – salystyryp tekserý maqsatynda qujattardyń túpnusqasyn mindetti túrde usyna otyryp, dinı birlestikti memlekettik tirkeý (qaıta tirkeý) týraly kýáliktiń nemese anyqtamanyń kóshirmesi;
3) tirkelgen dinı birlestiktiń basshysy qol qoıǵan ǵıbadat úıin (ǵımaratyn) salý týraly erkin nysandaǵy negizdeme (ǵıbadat úıiniń (ǵımaratynyń) ataýy jáne dinı birlestikke tıesili qurylystyń maqsaty, atalǵan ákimshilik-aýmaqtyqta turatyn (aýyl, eldimeken, aýyldyq okrýg, qaladaǵy aýdan, qala, aýdan, oblys) dinı qajettiligin qanaǵattandyrýǵa muqtaj adamdardyń sany men dinı ǵımaratta qyzmet beretin dinı qyzmetkeriniń kandıdatýrasy;
4) ǵıbadat úıin (ǵımaratyn) salý josparlanyp otyrǵan aýmaqta jergilikti qoǵamdastyq jınalysynyń (jıynynyń) ǵıbadat úıin (ǵımaratyn) salýǵa (jaqyn mańda ǵıbadat úıi (ǵımaraty) aýmaǵymen shektesetin (sonymen qatar, shekara aralyǵynda servıtýt, avtomobıl joly ótetin bolsa) turǵyn úıler bolǵan jaǵdaıda usynylady) kelisetini týraly sheshiminiń kóshirmesi.
«Osy oraıda, 300 metrden kem emes qashyqtyqta ornalasý sharty tek qana dinı zattardy satatyn dúkender jáne ǵıbadat úılerinen (mysaly, meshitter) tys jerlerde dinı is-sharalardy ótkizýge arnalǵan oryndarǵa ǵana qoldanylady. Sondyqtan qoǵamnyń meshitter nemese basqa din ókilderiniń dinı ǵımarattary súriledi dep dúrligýine eshqandaı negiz joq dep sendire alamyn», deıdi Qoǵamdyq damý mınıstrliginiń Qoǵamdyq kelisim Komıteti tóraǵasynyń orynbasary mindetin atqarýshy Balǵabek Myrzaev.
