Qazaqstan musylmandary dinı basqarmasynyń koronavırýstyń aldyn alý sharalaryna oraı juma namazyna qatysty málimdemesi

Qurmetti jamaǵat!

Búginde álem jurtshylyǵyn dúrliktirgen koronavırýs kóptegen elderge tarap úlgerdi. Vırýsty juqtyrǵan adam sany artýda. Bul dert bizdi de alańdatyp otyr. 

Osyǵan oraı, Qazaqstan musylmandary dinı basqarmasy sharıǵattaǵy zárýlik úkimin negizge ala otyryp, koronavırýstyń jamaǵat arasynda taralýynyń aldyn alý sharasy retinde juma namazyna baılanysty málimdeıdi:

• Juma namazynan aldyn aıtylatyn 30 mınýttyq ýaǵyz 20.03.2020 jyldan bastap ýaqytsha toqtatylady;
• Namaz ýaqyty kire sala azan aıtylady, 4 rakaǵat súnnet ótelip, juma namazynyń 2 rakaǵat paryzy qysqa súremen oqylady;
• Juma namazynyń paryzynan keıin oqylatyn 4 rákaǵat súnnetti úıde oqýǵa keńes beremiz;
• Namazdan keıin tásbıh tartylmaıdy, Quran oqylmaıdy, ımam qysqa duǵa jasaıdy;
• Namazdan keıin jamaǵat qol berip «Juma qabyl bolsyn» dep amandaspaıdy;
• Meshitke betperde (maska) kıip kelý;
• Namazdan keıin kóp kidirmeı meshitten shyǵý;
• Juma namazǵa balıǵatqa tolmaǵan balalardy alyp kelmeý;
• Juma namazǵa densaýlyǵy jaramaıtyn qarııalar, naýqastar men áıelderdiń qatyspaǵany abzal;
• Aýa-raıy qolaıly aımaqtarda juma namazyn meshit aýlasynda oqýǵa ruqsat.

Barsha musylman qaýymyn osy jaǵdaılarǵa túsinistikpen qaraýǵa shaqyramyz. Bul málimdeme aǵymdaǵy jyldyń 13 naýryzynan bastap kúshine enedi.​