Qazaqstan musylmandary dinı basqarmasynyń iritki týdyrǵan aqparatqa qatysty málimdemesi
Qazaqstan musylmandary dinı basqarmasy búginde áleýmettik jeli men aqparat alańynda keıbir adamdar tarapynan qoǵam arasynda iritki salatyn jazbalarǵa, qasıetti kitabymyz Qurandy mansuqtaǵan vıdeo materıaldarǵa, ardaqty paıǵambarymyz Muhammedti (oǵan Allanyń salaýaty men sálemi bolsyn) kelemejdegen jaǵymsyz beınelerdiń taralýyna narazylyq bildiredi.
Sebebi, sońǵy kezde asyl dinimizge qatysty negizsiz, qaralýǵa baǵyttalǵan jáne dinı, áleýmettik arazdyqty týdyratyn aqparattar beleń alyp barady. Osyǵan qatysty elimizdiń ár aımaǵyndaǵy musylman jamaǵatynan Dinı basqarmaǵa narazylyq hattar men shara qoldaný týraly shaǵymdar kelip túsýde.
Ata dinimiz ıslamdy joqqa shyǵaryp, Qudaıǵa, Quranǵa jáne Muhammed paıǵambarǵa (oǵan Allanyń salaýaty men sálemi bolsyn) til tıgizip, halyq arasynda iritki salyp, teris pikirlerin jaıýǵa tyrysqan adamdaryń áreketine sharıǵat turǵysynan jáne zań turǵysynan tıisti shara qoldanýdy suraýda. Jaqsylyq pen saýaptyń eselenetin aıy ramazan kezinde musylman balasynyń ar-ojdanyna, senimine til tıgizý sabyrdyń sheginen shyǵarýǵa túrtki bolýda.
Adamzat balasyn eki dúnıe baqytyna jeteleıtin qasıetti Qurandy mansuqtaý – aýyr kúná. Qasıetti Quranǵa qarsy sóz aıtý – Allaǵa qarsy kelý degen sóz. Qurandy mansuqtap, qarsy shyqqandardyń aqyry jaqsy bolmaǵany tarıhtan belgili.
QMDB kúlli musylman úmbeti úshin asa ardaqty, Allanyń sońǵy elshisi paıǵambarymyz Muhammedti (oǵan Allanyń salaýaty men sálemi bolsyn) kelemejdep, jaǵymsyz beıneler salǵan adamdarǵa bul áreketin shuǵyl túrde toqtatyp, musylmandardan keshirim suraýdy talap etedi.
Óziniń teris oıy men pıǵyly arqyly dástúrli dinimizge jaýlyq týdyryp, babalar salǵan dinı jolymyzdy joqqa shyǵaryp, el ishinde iritki týdyrýda. Ǵasyrlar boıy qalyptasqan dástúrli dinimiz ben senimimizdi qorlaý jaqsylyqqa aparmaıdy. Qasıetti Quranda: «Jer beti túzetilgennen keıin búlikshilik jasamańdar», – degen («Aǵraf» súresi, 56-aıat).
Qazaqstan zaıyrly, quqyqtyq memleket bolǵandyqtan azamattardyń dinı senimderi men ar-ojdanyna nuqsan keltiretin áreketter zań men quqyq aıasynda retteletinin málimdeıdi.
