Qazaq kúresinen QMDB júldesi úshin V Respýblıkalyq týrnır bastaldy (FOTO)
Búgin Astana qalasyndaǵy «Dáýlet» sport kesheninde Qazaqstan musylmandary dinı basqarmasynyń júldesi úshin qazaq kúresinen V Respýblıkalyq týrnır bastaldy. Dinı basqarma uıymdastyrýymen qazaq kúresinen jylda ótetin dástúrli doda bıyl Astana qalasynyń 20 jyldyǵyna oraı ótkizilip otyr.
Aıtýly sharanyń ashylý saltanatyna qazaqtan shyqqan tuńǵysh Olımpıada chempıony, sport sheberi Jaqsylyq Úshkempirov, QR Sport jáne mádenıet mınıstrligi Sport jáne dene shynyqtyrý isteri komıtetiniń tóraǵa orynbasary Ospanov Erlan, QR Qoǵamdyq damý mınıstrligi Qoǵamdyq kelisim komıtetiniń Tóraǵa orynbasary Balǵabek Myrzaev, QR Májilis depýtaty, Ulttyq sport qaýymdastyǵynyń Tóraǵasy Bekbolat Tileýhanov, Astana qalasy Qoǵamdyq damý isteri basqarmasynyń basshysy Danııar Esın, Astana qalasy Mádenıet jáne sport basqarmasynyń basshysy Bolat Majaǵulov, «Dáýlet» sport kesheniniń basshysy qazaq kúresinen Álem jáne Azııa chempıony, «Qazaq barysynyń» úsh dúrkin jeńimpazy Beıbit Ystybaev bastaǵan qoǵam jáne sport qaıratkerleri qatysyp, aq tilekterin arnady.
Sport dodasynyń ashylý saltanatynda Bas múftı Serikbaı qajy Satybaldyuly palýandarǵa aq jol tileı otyryp, búgingi sharanyń mán-mańyzyn aıryqsha atap ótti. Bıletten túsken qarjynyń qaıyrymdylyq maqsatynda jumsalatynyn tilge tıek etken Bas múftı palýandarǵa sáttilik tiledi. Paıǵambar (s.ǵ.s.) súnnetin jańǵyrtýǵa baǵyttalǵan búgingi saıystyń qoǵam arasynda salaýatty ómirdi nasıhattaýǵa qosar úlesiniń de jemisti bolýyn tiledi.
Aıta keteıik, búgin boz kilem ústinde Aıbek Nuǵymarov, Muhıt Tursynov, Elaman Erǵalıev, Rýslan Abdýrazaq sııaqty Azııa chempıony, «Qazaq barysynyń» júldegerleri men elimizdiń barlyq aımaqtarynan kelgen jeńimpazdar kúsh synasady.
Elimizdiń 19 óńirinen kelgen qyryqqa jýyq balýandy qoldaýǵa aıtysker aqyn Amanjol Áltaev, telejúrgizýshi Beısen Quranbek, ánshi Qaırat Nurtas, Qýandyq Raqym jáne Ulytaý toby bastaǵan óner juldyzdary da qatysyp, sporttyq-qaıyrymdylyq sharany ánmen árlep, kúımen kómkerdi.
Jerebe tartylyp, jarys bastalar aldynda júrekterin úmit pen kúdik qatar kernegen palýandarymyzǵa qazaqtan shyqqan tuńǵysh Olımpıada chempıony Jaqsylyq Úshkempirov aǵamyz aq batasyn berip, júrekjardy tilegin arnady.
Sýretterdi «FOTOGALEREIa» aıdarynan kóre alasyzdar!
