Qazaq kúresinen QMDB júldesi Aıbek Nuǵymarovqa buıyrdy (FOTO)

«Dáýlet» sport keshenine jıylǵan jankúıer qaýymnyń júregin dúbirletip, jamaǵattyń delebesin qozdyrǵan V Respýblıkalyq týrnır búgin óz máresine jetti. Elimizdiń túkpir-túkpirinen jıylǵan 39 balýan búgin boz kilem ústinde namysy men qaıratyn qatar synǵa salyp, dúbirli dodanyń kórigin qyzdyrdy. Birinen-biri aıla-tásilin asyryp, dúıim halyq aldynda sheberlikterin kórsete bilgen palýandar jamaǵattyń rızashylyǵyn týdyryp, ystyq yqylastaryna bólene bildi.

Elimizdiń barlyq aımaqtarynan bas qosqan apaıtós, atan jilik jigitterdiń arasynan qarsylasyn qapy qaldyryp, jaýyryny jer ıiskemegen semeılik Aıbek Nuǵymarov QMDB júldesi úshin uıymdastyrylǵan V Respýblıkalyq týrnır jeńimpazy atanyp, bas júlde «Qajylyq joldamasyn» jeńip aldy. Aıta keteıik, saıystyń bıylǵy sharty boıynsha palýannyń bapkerine de qazaq kúresiniń damýyna sińirgen eńbegi úshin qajylyq joldamasy berilip otyr.

Tóreshiler sheshimi boıynsha týrnırdiń júldeli II-orny Soltústik Qazaqstan oblysynyń palýany Muhıt Tursynovqa buıyrdy. 39 palýannyń ishinen tek Aıbek Nuǵymarovqa qana ese jibergen palýan men onyń bapkerine «Kishi qajylyq joldamasy» berildi.

Al, III-oryn júldegerine tıesili «Saryaǵash» emdeý-saýyqtyrý ortalyǵynyń joldamasy Qyzylorda qalasynan kelgen Isaǵabylov Maqsatqa buıyrdy. Palýannyń bapkerine de shıpajaıǵa joldama tartý etildi.  

Sondaı-aq, jamaǵattyń erekshe yqylasyna bólengen Shymkent qalasynyń palýany Shamshıdınov Qaısar «Kórermen kózaıymy» atanyp, jattyqtyrýshysymen birge ataýly syılyqqa ıe boldy.

Saıys jeńimpazdaryn marapattap, sport salasyndaǵy eńbekterine jemis tilegen QMDB tóraǵasy, Bas múftı Serikbaı qajy Oraz ulttyq qazynamyz Qazaq kúresin halyq arasynda keńinen nasıhattaýda osyndaı sharalardyń mańyzy aıryqsha ekenin atap ótti.

Aıta keteıik, jeńimpazdarǵa úlken qajylyq jáne umra qajylyq joldamasyna «Nur-Qazaqstan», «Tawaf travel», «Hıdaıat nýr», «Hıkmet» qajylyq kompanııalary demeýshilik jasap otyr.

Sýretterdi «FOTOGALEREIa» aıdarynan kóre alasyzdar!