Qaraǵandyda birliktiń biregeı belgisi bolǵan meshit ashyldy
0 qyrkúıek kúni Qaraǵandy oblysy, Buqar jyraý aýdany, Úshtóbe eldi mekeninde eńseli meshittiń ashylý saltanaty ótti. Meshit tolyqtaı aýyl turǵyndarynyń qarajat, qajyr-qaıratymen salynǵan. Meshit úsh qabattan turady: tómengi qabatynda ashana, erler jáne áıelderge arnalǵan dárethanalar júıesi jáne máıit jýatyn bólme bar. Ústińgi qabatynda Quran oqý bólmesi, oqý synybymen qatar 300 adam namaz oqıtyn erler zaly jáne ımamnyń bólmesi ornalasqan. Al joǵarǵy qabatynda áıel adamdarǵa arnalǵan oqý synyby jáne 80 adam namaz oqıtyn úlken zal bar. Meshittiń jaryq júıesin «Qaraǵandy-Jaryq» JShS Bas dırektory Nurjan Ibragımuly Imanov tegin qosyp bergen eken. Alystan ańǵarylatyn altyn jalatylǵan kúmbeziniń materıalyn Reseıden tapsyryspen saýap úmit etken bir kásipkerdiń otbasysy aldyryp beripti. Áleýmettik jeliler arqyly kópshilik qulaǵdar bolǵan meshit qurylysyna Úshtóbe orta mektebiniń bastaýysh synyp oqýshylary da úles qosypty. Ata-analary mektepke bararda beretin azyn-aýlaq qarajatty jınap, ózderi tamaq ishpese de meshit qurylysy toqtamasyn degen nıetpen meshitke bergen eken. Qarttar úıinde jatqan keıýana da qolyndaǵy bar qarajatyn meshitke bergenin estigen kópshilik bir tolqydy.
Osylaısha kóp túkirse kól bolaryn Úshtóbe meshiti taǵy bir dáleldedi.
Meshittiń ashylý saltanatynda sóz alǵan oblys ókil ımamy Ómirzaq qajy:
«Osyndaı eńbekpen salynǵan meshit endi jamaǵatpen kórkeısin. Bes ýaqyt namazda meshitten tabylyńyzdar. Balalaryńyzdy meshitke ımandylyq sabaqtaryna ákelińizder. Meshit sonysymen kórikti bolmaq» - dep kópshilikke oı tastady.
Ashylý saltanatyna Astanadan Alashtyń ardaqty aqyny Amanjol Áltaev, «Habar» arnasynyń elge tanymal jýrnalısi Zeıin Álipbek arnaıy kelgen eken. Qosshy eldi mekeninde ornalasqan Respýblıkalyq qarılar ortalyǵynyń dırektory Sádýaqas qarı Oljabaıuly da meshit ashylý saltanatynyń qurmetti qonaǵy boldy.
Ashylý saltanatynda sóz alǵan oblystyq jastar saıasaty basqarmasynyń basshysy Mıras Quttybaı:
«Bul meshit el birligi men áleýmettik jeliniń áleýetin dáledep bergen meshit boldy» - dep quttyqtaý sózin jetkizdi.
Aýdan ákiminiń orynbasary Arman Shálıuly men aýyl ákimi Eltaı Jamantaıuly aýdan basshylyǵynyń ystyq yqylasy jetkizip, jamaǵatty qýanyshpen quttyqtady.
