QALA BAS IMAMY SARYARQA AÝDANYNDAǴY MEShITTERDI ARALADY
Astana qalasynyń bas ımamy Nurbek qajy Áýeshanuly Saryarqa aýdanynda ornalasqan meshitterge baryp, qulshylyq ordalarynyń tynys-tirshiligimen tanysty.
Aldymen «Kóktal» meshitine at basyn buryp, din qyzmetkerlerimen kezdesti. Meshittiń bas ımamy Sábıt Erejepov meshittiń qazirgi jaǵdaıy, jamaǵatpen atqarylyp jatqan jumystardy baıandady.
Nurbek qajy Áýeshanuly óz kezeginde dinı qyzmettiń jaýapkershiligine toqtalyp, ımamdardy birlik pen yntymaqty saqtaýǵa, jamaǵatqa kórkem minez tanytýǵa shaqyrdy. Sonymen qatar meshit tazalyǵy, qulshylyq ordalarynyń ishki tártibi men kelýshilerge qolaıly jaǵdaı jasaý máselelerine erekshe nazar aýdardy.
Odan keıin qala bas ımamy «Sheıh Kýnta qajy» meshitine baryp, meshittiń bas ımamy Ómirzaq qajy Qazkenulymen júzdesti. Kezdesý barysynda meshit ujymy atqarylyp jatqan jumystar týraly baıandap, turaqty túrde ótkizilip kele jatqan dárister jaıynda málimet berdi. Jýyrda aıaqtalǵan «Imanı jaz – 2026» jazǵy saýat ashý kýrsynyń nátıjeleri tanystyrylyp, shákirtterdiń dinı saýatyn arttyrý men ulttyq qundylyqtardy dáripteý baǵytynda atqarylǵan jumystar sóz boldy.
Jalpy kezdesýler barysynda Nurbek qajy Áýeshanuly meshitterde júrgizilip jatqan jumystardy saralaı otyryp, dinı-aǵartýshylyq baǵyttaǵy bastamalardy odan ári kúsheıtýdiń mańyzyn atap ótti. Sonymen qatar meshit qyzmetin jetildirýge qatysty birqatar usynystaryn ortaǵa saldy.
Aıta keteıik, qala bas ımamy elorda meshitterimen turaqty baılanys ornatyp, olardyń jumysyna baǵyt-baǵdar berý maqsatynda júıeli túrde kezdesýler ótkizip keledi.
