QALA BAS IMAMY: ELORDA IMAMDARY OTBASY INSTITÝTYN NYǴAITÝǴA ATSALYSÝ QAJET

Astana qalasynyń bas ımamy Nurbek qajy Áýeshanuly Esil aýdanynda ornalasqan «Ál-Ǵanı», «Áljan ana» jáne «Ál-Farabı» meshitterine sondaı-aq Syǵanaqı ınstıtýtyna baqylaý-basqarý baǵyty aıasynda at basyn buryp, qulshylyq ordalarynyń tynys-tirshiligimen tanysty.

Sapar barysynda «Áljan ana» meshiti janynan ashylǵan Otbasylyq keńes berý ortalyǵynyń resmı ashylý rásimi ótti. Ortalyqtyń ashylýyna arnaıy qatysqan qala bas ımamy Nurbek qajy Áýeshanuly jańa bastamaǵa aq batasyn berdi.

Ortalyqtyń negizgi maqsaty – otbasy qundylyqtaryn nyǵaıtý, erli-zaıyptylar arasyndaǵy ózara túsinistik pen tatýlyqty arttyrý, sondaı-aq otbasylyq máseleler boıynsha rýhanı jáne psıhologııalyq keńes berý jumystaryn júrgizý. Bas ımam bul ıgi bastamanyń qoǵamdaǵy otbasy ınstıtýtyn saqtaýǵa jáne januıalyq qundylyqtardy dáripteýge mańyzdy úles qosatynyn atap ótti.

Al «Ál-Farabı» meshitine barǵan tusta jamaǵatpen kezdesip, nashaqorlyqtyń aldyn alý taqyrybynda nasıhat aıtty. Bas ımam jastardy zııandy ádetterden saqtanýǵa, salaýatty ómir saltyn ustanyp, rýhanı qundylyqtardy berik ustaýǵa shaqyrdy.

Syǵanaqı ınstıtýtynda ótken kezdesýde de ilim ordasynyń ustazdary men shákirtteriniń basyn qosyp, arnaıy jıyn ótkizdi. Basqosýda tárbıe men bilim berý úderisindegi jaýapkershilik jóninde mazmundy pikir almasý ótti.

Jalpy meshitterge jasaǵan baqylaýy aıasynda bas ımam Qurban aıt merekesin joǵary deńgeıde uıymdastyrýǵa atsalysqan meshit ujymdaryna alǵysyn bildirip, aldaǵy jumystarǵa qatysty birqatar mańyzdy mindetterdi tapsyrdy.

Sondaı-aq, basymdyq berip aıtylǵan tapsyrmalardyń biri «Islam jáne adal qoǵam» jyly aıasynda qoǵamdyq qundylyqtardy nasıhattaý boldy. Ásirese, otbasy ınstıtýtyn nyǵaıtýǵa barynsha atsalysý, osy turǵydan meshitterde jamaǵatqa arnalǵan dáristerdi kóbeıtý, qaıyrymdylyq pen áleýmettik jaýapkershilikti arttyrý baǵytyndaǵy jumystardy kúsheıtý tapsyryldy.

Jat aǵymnyń aldyn alý jáne jastardyń dinı saýatyn arttyrý máseleleri de nazardan tys qalmady. Nurbek qajy Áýeshanuly meshitterde Hanafı mázhaby men Matýrıdı senim mektebiniń ustanymdaryn tereń túsindirýdiń mańyzyn atap ótip, jamaǵatpen jumys barysynda kórkem nasıhat pen danalyqqa basymdyq berý qajettigin jetkizdi.

Qorytyndylaı kele, atalǵan meshitterdiń búgingi jaı-kúımen tolyq tanysyp shyqqan bas ımam atqarylyp jatqan jumystardy saralady. Kezdesýlerde tek artyqshylyqtar ǵana emes, nazar aýdarýdy qajet etetin máseleler de ashyq aıtyldy. Ár meshit óz aýmaǵyndaǵy halyqtyń rýhanı suranysyna jaýap bere alatyn deńgeıde jumys isteýi kerektigin atap ótti.

Источник: Aisha