Qaǵbanyń kısýasy «Halıfa Altaı» meshitine tabystaldy (FOTO)
Búgin Shyǵys Qazaqstan oblystyq «Halıfa Altaı» meshitine Mekkedegi qasıetti Qaǵbanyń 2016 jylǵy kısýasy meshit murajaıyna tabys etildi.
Saltanatty shara osy meshitte ashylǵan «Islam mádenıeti jáne dástúr» murajaıynda ótti. Is-sharaǵa «Nur Qazaqstan» qajylyq kompanııasynyń dırektory Amankeldi Erenǵaıypuly, ǵulama Halıfa Altaıdyń uly Abdýrahım Altaı, qazaq kúresinen birneshe dúrkin «Qazaqstan barysy» jáne «Álem barysy» Aıbek Nuǵymarov syndy qaıratkerlermen óńirdiń qoǵam qaıratkerlerimen meshit jamaǵaty, aqsaqaldar jáne jastar qatysty.
Qurmetti rásimdi ashyp sóz sóılegen QMDB Óskemen aımaǵynyń bas ımamy Ermek Qasbolatuly:
«Búgin shyǵys jurty úshin asa qýanyshty kún bolyp otyr. Meshitimizge barsha musylmannyń kıeli mekeni Qaǵbanyń jamylǵysyn kútip alý rásimine qosh keldińizder. Bul kısýa – qasıetti Qaǵbanyń bir bólshegi, Mekkeniń bir bóligi degen sóz. Osynaý kıeli jádiger Abaı men Shákárim týǵan ǵulamalar mekeni shyǵystyń rýhanı murasy bolyp bolashaq urpaqqa saqtalady. Osy ıgi iske Amankeldi Erenǵaıypuly bastaǵan qajylar bastamashy boldy. Biz murajaımyzǵa osyndaı kıeli jádigerlerimizdi jınaýdamyz. Kısýa shyǵysqa bereket ákelsin» dep izgi tilegin bildirdi.
Bas ımam sonymen qatar, osy istiń uıtqysy bolǵan azamattarǵa alǵysyn jetkizip, meshittiń rýhanı ortalyqqa aınalýdaǵy mańyzyna toqtaldy.
Jıynda «Nur Qazaqstan» qajylyq kompanııasynń dırektory Amankeldi Erenǵaıypuly Qaǵbanyń 2016 jylǵy kısýasyn saltanatty túrde bas ımamǵa tartý etti.
«Biz Mekkedegi qasıetti Qaǵbanyń kiltin ustaý murageri Shaıbı urpaqtarymen kelissóz júrgize otyryp, «Halıfa Altaı» atamyzdyń meshitine osy qundy jádigerdi tartý etip otyrmyz. Biz olarǵa Halıfa Altaıdyń ıslam dini úshin jasaǵan ushan-teńiz eńbegin aıtyp, tanystyrdyq. Din ǵulamasy Halıfa Altaı atyndaǵy meshit kısýaǵa ıe bolýǵa birden bir laıyq meshit ekendigin jetkizdik. Olar usynysymyzdy qurmetpen qarsy alyp, qoldaryn qoıyp, mór basyp, kýálandyryp, osy jádigerdi Altaı baýraıyndaǵy Halıfa Altaı atamyzdyń meshitine tartý etti» dedi A.Erenǵaıypuly.
Qasıetti Qaǵbanyń jamylǵysyn meshit jamaǵaty men óńir halqy qoshametpen qarsy alyp, meshit ishinen Qaǵbanyń jupary ańqyp bir sát aınala ǵajaıyp nurǵa bólendi. Saltanatty sharaǵa jınalǵandar kısýany táý etip, qurmet kórsetip, elimizdiń tynyshtyǵy men dinimizdiń abyroıy úshin duǵa jasady.
Qaǵbanyń kısýasy oblystyq «Halıfa Altaı» meshitiniń «Islam mádenıeti jáne dástúr» murajaıyna qoıyldy. Tamashalaýshylarǵa árkez esik ashyq.
