Qadir túni Elorda meshitterinde 16 000 janǵa tegin sáresi berildi (FOTO)
Qasıetti Qadir túni Allanyń jerdegi úıi – meshit bitken jamaǵatqa lyq tolyp, saýapty túndi sap túzegen qalypta qarsy alǵan múminder qatary jyl sanap kóbeıe túskendeı. Elimizdegi qulshylyq ordalarynan bul túni ıne shanshar jer tabý qıyn. Saýaby myń jylǵa tatıtyn berekeli túndi barynsha qulshylyq-ǵıbadatpen ásemdep, ýaǵyz-nasıhat tyńdap, taǵylymdy ótkizýge tyrysqan jandardyń kóptigi sonsha, bul túni kólemi jaǵynan Ortalyq Azııada teńdesi joq «Áziret Sultan» meshitiniń ózi jamaǵatqa tarlyq etip jatady. Osy sebepti de bul túni Bas meshit aýlasyna arnaıy tósenishter tóselip, ishtegi ımam ýaǵyzyn tikeleı kórsetip turatyn LED Ekrandar qoıylyp, jamaǵatqa jaılylyq jasalyp kele jatyr. Búginde bul ıgi bastama Elordamyzdaǵy basqa qulshylyq ordalarynda jalǵasyn taýyp, jamaǵat rızashylyǵyn týdyryp keledi.
QMDB tóraǵasynyń birinshi orynbasary, naıb múftı, Nur-Sultan qalasynyń ókil ımamy Naýryzbaı qajy Taǵanulynyń bastamasymen osydan birer jyl buryn qasıetti Qadir túninde jamaǵatqa tegin sáresi taratylyp bastalǵan bolatyn. Bıylǵy jyly bul shara Elordamyzdyń barlyq meshitterinde ótkizilip, Qadir túniniń berekesin arttyra tústi.
Ekinti ýaqytynan bastap meshit aýlasynda arnaıy dastarhandar ázirlenip, ár qulshylyq ordasy qasıetti Qadir túnine qyzý daıyndyqpen kirisken bolatyn. Ulyq túnniń qurmetine oraı berilgen sáresi jamaǵatqa jylý syılap qana qoımaı, ýaqyt únemdep, saýapty túndi barynsha izgi amaldarmen ótkerýge kóp septigin tıgizdi.
«Áziret Sultan» – 4 000 adam.
«Nur Astana» – 2 000 adam.
«Ǵylmanı» – 5 000 adam.
«Áljan ana» – 2 000 adam.
«Sheıh Kýnta qajy» – 1200 adam.
«Yryskeldi qajy» meshiti – 500 adam.
«Aqmeshit» – 400
«Ás-Sálam» meshiti – 320 adam.
«Tólebaı» meshiti – 300 adam.
«Ál-Ǵanı» meshiti – 230 adam.
