Pitir sadaqasy men zeketti kaspi.kz mobıldi qosymshasy arqyly aýdarýǵa bolady (FOTO)
Elimizdegi tótenshe jaǵdaıǵa baılanysty Ramazan aıynda beriletin pitir sadaqasy men zeketti kaspi.kz mobıldi qosymshasy arqyly aýdarýǵa bolady.
Elordada Bas múftı Naýryzbaı qajy Taǵanulynyń tóraǵalyǵymen onlaın rejımde ótken Tóralqa májilisinde osyndaı sheshim qabyldandy.
QMDB jáne bank basshylyǵy arasynda jasalǵan kelisimge sáıkes, bul joba qasıetti Ramazan aıynda júzege aspaq. Búginde ortaq jobanyń qosymsha jumystary qaldy. Jumys tolyq aıaqtalǵan soń jaqyn kúnderde onlaın sadaqa berý jobasy iske qosylady. Bul týraly qosymsha habarlanady.
Mobıldi qosymshaǵa ár oblys pen respýblıkalyq mańyzy bar qalalardaǵy ortalyq meshitterdiń esepshoty engiziledi. Ár azamat óz óńirindegi meshittiń esepshotyna pitir sadaqasy men zeketin úıden shyqpaı onlaın rejımde aýdara alady.
Aıta ketsek, QMDB Tóralqa májilisiniń sheshimimen bıyl bir adam atynan beriletin pitir sadaqa mólsheri 370 teńge dep bekitildi. Pitir sadaqanyń quny eki keli unnyń respýblıka boıynsha eseptegende naryqtyq ortasha baǵasymen shyǵaryldy. Al materıaldyq jaǵdaıy bar azamattar pitir sadaqany meıiz nemese qurma qunymen bergeni abzal.
Óz qajettiligin qospaǵanda mal-múlki, dúnıesi kúmis nısabyna jetken, ıaǵnı 127 myń teńgesi bar adam Ramazan aıynda ózi jáne januıasy úshin pitir sadaqasyn berýi – ýájip (mindet). Pitir sadaqasy pendeniń oraza kezinde jiberip alǵan qate-kemshilikteriniń óteýi úshin jáne kómekke muqtaj jandardy materıaldyq qoldaý maqsatynda beriledi.
Bıyl qasıetti Ramazan aıy 24 sáýirde bastalady. Tótenshe jaǵdaıǵa baılanysty juqpaly indettiń aldyn alý úshin meshitterde juma, taraýyq, kúndelikti jamaǵat namazdary ýaqytsha oqylmaıdy. Sonymen qatar, meshit pen qoǵamdyq oryndarda aýyzashar berilmeıtin boldy.
