Ózge din ókili Bas meshitke óz týyndysyn tartý etti (FOTO)
Elordamyzdyń kelbetin kórkeıtip, ajaryn arttyra túsken respýblıkalyq «Áziret Sultan» meshitiniń sáýleti men sulýlyǵy áli kúnge áserin joǵaltpaǵandaı. Qaıta kún sanap kóz bitkendi ózine qaratyp, júrek ataýly ózine shaqyryp turatyn rýhanı ordany arnaıy zııarat etip, alystan izdep keletinder sany kóbeıe túsken. Elorda tórindegi Bas alańdy búıirleı jaıǵasqan mańǵaz meshittiń ulttyq naqyshtaǵy erekshe sáýleti men jamaǵatqa jasalǵan jaılylyqtyń arqasynda bolar, Bas meshitten bul kúnde adam nópiri úzilmeıdi.
Bir qyzyǵy, bul meshit ózge din ókilderiniń de únemi kelip turatyn tynyshtyq mekenine aınalǵandaı eken. Jaqynda ǵana ótken oqıǵa osy aıtqanymyzdyń tuzdyǵy bolatyndaı. Elorda qalasynda turatyn Sergeı Prýsakov hrıstıan dinin ustansa da, «Áziret Sultan» meshitine únemi kelip turatyn kórinedi. Qulshylyq ordasynan janyna jaılylyq sezinip, jıi kelip turýǵa tyrysady eken.
Ásemdikke jany qushtar Sergeıdiń sýretke túsirýmen áýestenetini de bar eken. «Áziret Sultan» meshitin únemi taspaǵa tartyp júretin ol osy týyndylaryn meshitke tartý etýdi jón sanapty. Degenmen, alǵashynda «hrıstıan bolǵandyǵymnan, syılyǵymdy qabyl etpeı qoıa ma» degen qaýpi de bolǵan eken. Alaıda, onyń bul kúdigi men kúmáni meshit qyzmetkeri Jandos Tájimuratulymen kezdese salysymen kúldeı ushypty.
Sergeıdiń aq nıetinen týyndaǵan tartýyn qýanyshpen qabyldap, izgi tilegin bildirgen Jandos ustaz asyl dinimizdiń kitap ıelerimen jaqsy qarym-qatynasta bolýǵa úndeıtinin aıtyp, qulshylyq ordasynyń esigi kelem degen janǵa qashanda ashyq bolatynyn jetkizdi.
