Otbasy kúnine oraı jas jubaılarǵa arnalǵan semınar ótti (FOTO+VIDEO)

Elimiz boıynsha qyrkúıek aıynyń ekinshi jeksenbisi saıyn atalyp ótiletin Otbasy kúniniń qurmetine oraı respýblıkalyq «Áziret Sultan» meshitinde jas jubaılarǵa arnalǵan semınar-trenıng bolyp ótti. Aıtýly merekege oraı QMDB jarııalaǵan Otbasy aptalyǵy aıasynda uıymdastyrylǵan sharaǵa sońǵy bir jyl ishinde «Áziret Sultan» meshitinde nekesin qıdyrǵan jas otbasylar shaqyrylyp, tálim-tárbıege toly nasıhat dáristerimen sýsyndap qaıtty.

Úlken ómirge qol ustasyp birge kósh bastaǵandaryna jylǵa jetpegen jas jubaılar úshin otbasylyq ómirdiń alǵashqy jyldarynda aǵalyq aqyl-keńes, úlkennen úlgi-ónegeniń naǵyz kerek shaǵy. Osyny eskergen meshit ımamdary otbasy birligi men tynyshtyǵyn saqtaý jóninde tushymdy nasıhat aıtyp, januıa jarasymyna qol jetkizý joldary jaıly baıandady. «Áziret Sultan» meshitiniń bas ımamy Erbolat Júsipov bul jobanyń aldaǵy ýaqytta jelisi úzilmeı, jalǵasyp turatynyn jetkizdi. Otbasy qundylyqtar jóninde sabaq bolarlyq nasıhat aıtyp, qasıetti Quran aıattary jáne Paıǵambar (s.ǵ.s.) ómiri men ósıetterinen úlgi kórsetken ımamdar nasıhaty semınar qatysýshylary úshin orny bólek azyq boldy.

Kesh sońynda «Áziret Sultan» meshiti atynan jas jubaılarǵa Otbasy kúnine merekesine oraı arnaıy utys syılyqtary oınatylyp, jeńimpazdardy marapattaý rásim bolyp ótti.

Sýretterdi «FOTOGALEREIa» aıdarynan kóre alasyzdar!