Otandy qorǵaý – qasıetti borysh
Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn!
Qurmetti baýyrlar!
Barshańyzdy Otan qorǵaýshylar kúnimen shyn júrekten quttyqtaımyn! Bul – ár er azamattyń patrıottyq sezimin oıatatyn, Otandy qorǵaý jaýapkershiligin arttyratyn mańyzdy mereke.Ár otbasyna bereke, áskerı saladaǵy ulandarymyzǵa myqty jiger, jastarymyzǵa qajyr-qaırat tileımin. Mereke qutty bolsyn!
Mereke tek toılaýmen ólshenbeıdi. Oılaý – el ıgiligi jolynda qadam jasaýdyń alǵysharty. Kórnekti aqyn Muhametqalı (Muqaǵalı) Maqataevtyń:«Ońaı sóz ǵoı «Otandy súıem» degen, Ne tyndyrdyń «basymdy ıemmenen?» – dep oı tastaýy tegin emes.
Búgingi sanaly urpaqtyń sanasynda «Otanǵa qalaı qyzmet etsem eken?» degen saýal jańǵyryp tursa ıgi.
«Otandy súıý – ımannan», – degen ataly sóz bar. Imandy adam óz eliniń naǵyz patrıoty bola alady. Otanshyldyq sezim Otanǵa, týǵan eline, onyń tiline, týyp ósken jerine, salt-dástúri men mádenıetine degen qurmetten bastalady.
Otanshyldyqtyń máıegi – ultty súıý. Óz ultyn, eli men jerin súıip, onyń damýyna qyzmet etip, janashyrlyq tanytqan jan ǵana otanshyl bola alady. Otanshyldyq sana halyqtyń óz ana tilin, dilin, dinin berik saqtaýymen jáne ony maqtan tutýymen ólshenedi.
Ardaqty Paıǵambarymyz Muhammed (oǵan Allanyń salaýaty men sálemi bolsyn) qasıetti hadıs-sharıfinde Mekkeni meńzep: «Sen men úshin sondaı qymbatsyń, súıiktisiń...» dep, óziniń týǵan jerine aıryqsha sezimi men súıispenshiligin bildirgen.
Asyl dinimizde musylman balasynyń óz Otanyn, otbasyn, ar-namysyn, mal-múlkin qorǵaý qasıetti amaldardyń qataryna jatady. Taǵy bir hadıste Otandy qorǵap, shekara kúzetken adamnyń Alla aldyndaǵy dárejesi artatyny baıandalǵan.
Islam – tek qulshylyqtardan ǵana quralǵan din emes. Dinimiz Otandy qorǵap, eldi súıýge, beıbit, izgi qoǵam qurýǵa úndeıdi. Otanshyl adam sózimen ǵana emes, isimen de úlgi-ónege bolýy tıis. Osy rette Áıteke bı babamyzdyń: «Ómirim – halyqtiki...» degen naqyl sóziniń tárbıelik máni zor.
Qazaqstan musylmandary dinı basqarmasy ımamdar forýmynda qabyldaǵan «Jeti rýhanı qazyq» Tuǵyrnamasynda ár azamattyń boıynan tabylýy tıis otanshyldyq sıpatty aıryqsha atap ótti. Óıtkeni, Otandy qorǵaý – qasıetti borysh, otanshyl bolý – izgi amaldyń biri.
Qurmetti qaýym!
Otan qorǵaýshylar merekesi qutty bolsyn! Alla Taǵala eldiń erteńin oılaıtyn, halyqqa aıanbaı qyzmet etetin, Otanyn qorǵaıtyn asyl azamattardyń qataryn arttyrǵaı.
Jaratqan Iemizdiń syıǵa bergen Táýelsizdigimiz ben kıeli Otanymyzdyń bolashaǵy baıandy bolǵaı! Árqashan elimiz aman, jerimiz tynysh bolsyn! Ámın!
Naýryzbaı qajy TAǴANULY,
Qazaqstan musylmandary dinı basqarmasynyń tóraǵasy, Bas múftı
