Óskemendik kásipker ımamǵa kólik mingizdi (FOTO)

Óskemen qalasynyń turǵyny, kásipker Qaınar Dúısenuly qalalyq «Zashıta» meshitiniń bas ımamy Almas Kenjeǵulovqa sý jańa kóliktiń kiltin juma namazynda jamaǵat aldynda tabys etti.

QMDB Óskemen aımaǵynyń ókil ımamy Ermek Qasbolatuly:

«Kásipker azamat, din janashyry Qaınar Dúısenuly baýyrymyz ımam Almas ımamǵa úlken qurmet kórsetip otyr. Halqymyzda Jaqsynyń jaqsylyǵyn aıt, nury tasysyn degen naqyl sóz bar. Almas Kenjeǵulov uzaq jyldar boıy qalalyq «Zashıta» meshitin basqaryp, meshittiń barlyq qujattaryn rettep, jóndeý jumystaryn júrgizip, qaladaǵy eń bir úlgili meshitke aınaldyrdy. Mine, búgin halyq, jomart azamattar onyń bul eńbegin baǵalap otyr. Jańa kólik Almas Aıtkárimulynyń ıgiligine jarasyn, dinimizdiń janashyry Qaınar baýyrymyzǵa Alla razy bolsyn» dep tilek bildirdi.

Kásipker Qaınar Dúısenuly asyl dinimiz úshin árkez qaıyrymdylyq isterin jasaı beretindigin jetkizip, ımamdardyń qyzmetine sáttilik tiledi.

​