Oraza aıt múbárak bolsyn!
Aılardyń sultany bolǵan qasıetti Ramazandy aman-esen ótkerip, Oraza aıt merekesine tórt kózimizdi túgel jetkizgen Jaratýshy Allaǵa sansyz shúkirlikter men madaqtar bolsyn! Qasıetti aıdy qulshylyqpen ótkizip, qaıyrymdylyq pen izgilik jolyn keńeıtken, sabyrlyq pen shydamnyń shyńyn baǵyndyryp, nápsi ataýlyny álsirete kúıretken musylman qaýymy úshin Oraza aıt meıramynyń orny erekshe.
Bul mereke – meıirim men mahabbattyń, izgilik pen ımandylyqtyń, tatýlyq pen baýyrmaldyqtyń, kishipeıildilik pen keshirimniń saltanat quratyn mereıli merzimi. Qazaq dalasyndaǵy árbir shańyraqqa búgingi mereke qut-berekesin tógip, dastarhanyndaǵy yrys-molshylyq eselene túskeı! Ulyq merekeniń meıiri júrekterdegi tońdy jibitip, arazdasqannyń arasy birigip, birlikti tý etken egemen elimizdiń abyroıy asqaqtaı bergeı!
Alla Taǵala barshamyzdyń tutqan orazamyz ben qasıetti aıdaǵy qulshylyq-ǵıbadattarymyzdy qabyldyqqa jazyp, keler jylǵy Ramazanǵa aman-esen jetýimizdi násip etkeı! Dinimizge qýat, halqymyzǵa ıman baılyǵyn bergeı!
Naýryzbaı qajy Taǵanuly
QMDB tóraǵasynyń birinshi orynbasary, naıb múftı,
Respýblıkalyq «Áziret Sultan» meshitiniń bas ımamy
