Ókildik jınalysynda Halyqaralyq konferentsııaǵa daıyndyq jumystary pysyqtaldy (FOTO)

Búgin respýblıkalyq «Áziret Sultan» meshitinde Nur-Sultan qalasy ókildiginiń jalpy jınalysy bolyp ótti. QMDB tóraǵasynyń birinshi orynbasary, naıb múftı Naýryzbaı qajy Taǵanulynyń tóraǵalyǵymen ótken jınalysta «Dinı Jibek joly. Islam jáne jastar: qazirgi zamannyń syn-qaterleri» atty IV Halyqaralyq ǵylymı-dinı konferentsııaǵa daıyndyq jumystary talqylanyp, birqatar naqty tapsyrmalar berildi.

Aıta keteıik, 10-12 sáýir kúnderi Nur-Sultan qalasynda ótetin aıtýly shara aıasynda kórshiles Reseı eliniń, Orta Azııa memleketteriniń musylman ǵalymdary, din kóshbasshylary bas qosatyn bolmaq. Úsh kúnge sozylatyn Halyqaralyq konferentsııanyń jumys josparynda birneshe irgeli is-shara kózdelgen. Elordamyzdaǵy 10 qulshylyq ordasynyń bas ımamdary men «Astana» medrese-kolledjiniń basshylyǵy qatysqan búgingi jınalysta josparǵa sáıkes tapsyrmalar berilip, jaýapty qyzmetkerler bekitildi.

QMDB-nyń Nur-Sultan qalasyndaǵy jańa ǵımaratynda ótetin Halyqaralyq jıynnyń mańyzdylyǵyn atap ótken Naýryzbaı qajy Taǵanuly barsha qyzmetkerlerdi aıanbaı qyzmet jasaýǵa shaqyrdy. Halyqaralyq deńgeıdegi konferentsııa jumysynyń oıdaǵydaı ótýi tek QMDB-nyń ǵana emes, elimizdiń de abyroı-bedelin bıiktete túsetinin eskerte ketti.

Sýretter toptamasyn «FOTOGALEREIa» aıdarynan kóre alasyzdar!