Nur-Sultanda jyl sońyna deıin 2000-ǵa jýyq otbasy turǵyn úımen qamtylady
2020 jyly elordalyq 2 myńǵa jýyq otbasy «Baqytty otbasy» baǵdarlamasynyń aıasynda turǵyn úımen qamtamasyz etiletin bolady. Atalmysh kórsetkish ótken jylmen salystyrǵanda 2 esege kóp dep habarlaıdy qala ákimdiginiń resmı saıty.
Respýblıkalyq bıýdjetten qarjylandyrýdyń kóbeıýine baılanysty 2020 jyly beriletin páter sany artyp otyr. Budan bólek, muqtaj otbasylarǵa turǵyn úıdi satyp alýdaǵy kómek jergilikti bıýdjet esebinen de júzege asyrylady. Baǵdarlamanyń árbir qatysýshysyna 1 mıllıon teńge mólsherde turǵyn úı sertıfıkattary bólinetin bolady.
Byltyr baǵdarlama aıasynda elordalyq 721 otbasy turǵyn úımen qamtylǵan. «Baqytty otbasy» baǵdarlamasynyń ekinshi kezeńin naýryz aıyna júzege asyrý josparlanyp otyr. Turǵyn úıge úmitker azamattar sanatyna kóp balaly, tolyq emes otbasylar, sondaı-aq erekshe qajettilikteri bar balalardy tárbıeleıtin otbasylar jatady.
Jumyspen qamtý jáne áleýmettik qorǵaý basqarmasynyń Turǵyn úı berý boıynsha azamattardy esepke alý bóliminiń basshysy Danııar Baltınniń aıtýynsha, qaryz 2 paıyzǵa beriledi, ıaǵnı otbasy 10 mıllıon teńge qaryz alsa, aı saıynǵy tólem 20 jylǵa shaqqanda 50 myń teńgeni quraıdy. Al artyq tólem 2 mıllıon jýyq teńgeni quraıtyn bolady.
Bıyl baǵdarlamany júzege asyrýǵa respýblıkalyq bıýdjetten 100 mlrd teńge qarajat bólingendigin atap ótken jón. Halyqtyń áleýmettik qorǵalmaǵan sanaty úshin páterlerdi satyp alýda kómekti jergilikti bılik te kórsetip otyr. Osy jyly ártúrli memlekettik baǵdarlamalar esebinen 8 myńǵa jýyq adamdy turǵyn úımen qamtamasyz etý josparlanǵan.
Eske salaıyq, «Bakytty otbasy» baǵdarlamasy QR Prezıdentiniń tabysy az múmkindikteri shekteýli balalary bar otbasylar, kóp balaly jáne tolyq emes otbasylar úshin turǵyn úıdi satyp alý qoljetimdiligin arttyrý boıynsha tapsyrmasyn oryndaý aıasynda iske qosyldy.
