Nur-Sultanda «Abaı álemi» ortalyǵy salynady
Keshe Memleket basshysy Qasym-Jomart Toqaev Nur-Sultan qalasynyń ákimi Altaı Kólginovti qabyldady.
Elorda ákimi Prezıdentke megapolıstiń mádenı ómiri boıynsha josparlardy baıandady. Nur-Sultan qalasynda Uly Abaıdyń 175 jyldyǵyna oraı «Abaı álemi» ortalyǵy boı kóteredi. Sonymen qatar Sáken Seıfýllın, Beıimbet Maılın jáne Ilııas Jansúgirovtiń 125 jyldyq mereıtoılaryna baılanysty qoladan quıylǵan «Úsh arys» eskertkishi ornatylady.
Memleket basshysy qalany odan ári damytý boıynsha birqatar naqty tapsyrmalar berdi. QR Prezıdentine áleýmettik álsiz toptardy qoldaý maqsatynda ashylǵan «Januıa» ortalyǵynyń jumysy, endi salynatyn ıppoterapııa jáne eki birdeı ońaltý ortalyǵy jaıynda baıandaldy.
Q.Toqaev úı kezeginde turǵan azamattardy, onyń ishinde az qamtylǵan otbasylardy, jumys isteıtin jastardy turǵyn úımen qamtý maqsatynda qoljetimdi baspana qurylysyn arttyrý týraly tapsyrmasynyń oryndalý barysy jaıynda esep berildi. Elorda ákimi úleskerlik problemaly qurylystar jaıy, qala shetindegi aýyl-aımaqtardy damytý máselesi aldaǵy 3 jyldyq bıýdjette qarastyrylǵanyn atap ótip, qalany gazben qamtý boıynsha atqarylyp jatqan jumystar týraly jetkizdi.
Qalany abattandyrý boıynsha esepten belgili bolǵandaı, eski alańnyń aýmaǵynan bastap shahardyń eki jaǵyn qosatyn jaıaý júrginshilerge yńǵaıly jol tóseledi. Jalpy jaıaý júrginshilerge yńǵaıly 80 shaqyrym jol tóselip, aldaǵy 3 jylda 100 shaqyrymnan astam velojol salynady. Sýmen qamtý jumystaryn jetildirý úshin atqarylatyn sharalar týraly da aıtyldy.
