Nur-Múbarak ýnıversıtetiniń ókilderi jeńimpaz atandy (FOTO)
Almaty qalasy Qoǵamdyq damý basqarmasynyń áleýmettik mańyzdy jobalar negizinde Ulttyq jýrnalıstik zertteý ortalyǵy uıymdastyrǵan baıqaýǵa 50-den asa úmitkerden 120-dan astam materıal túsken. Dinı Ekstrmemızmniń aldyn alýǵa baılanysty baıqaý tele-radıo, merzimdi BAQ, áleýmettik jeli, saıttar arasynda 10 nomınatsııa boıynsha sarapqa salyndy. M.Áýezov atyndaǵy ádebıet jáne óner ınstıtýtynyń dırektory fılol.ǵ.d. Kenjehan Matyjanov, ál-Farabı atyndaǵy QazUÝ jýrnalıstıka fakýltetiniń dekany fılol.ǵ.k., dotsent Saǵatbek Medeýbekov myrzalar bastaǵan 7 adamnan turatyn qazylar alqasy árbir jarııalymdy jiti sarapqa saldy. Nátıjesinde «Dinı Ekstremızmniń aldyn alý maqsatynda BAQ-ta úzdik shyǵarmalar jarııalaý» jónindegi baıqaýda «Merzimdi baspasózdegi qazaq tilindegi eń úzdik pýblıtsıstıkalyq maqala» nomınatsııasy boıynsha ıslamtanýshy-jýrnalıst, ýnıversıtettiń baspasóz hatshysy ıslamtanýshy-jýrnalıst Aısha Keńesbaı úzdik dep tanyldy.
Bıyl dástúrli úshinshi ret uıymdastyrylyp jatqan bul baıqaýǵa jýrnalıstıkadan tys din salasynyń mamandary da alǵash ret baq synap, Nur-Múbarak ýnıversıtetindegi Ekstremızmniń aldyn alý salasyndaǵy mamandardy qaıta daıarlaý ınstıtýtynyń dırektory, belgili teolog Asqar Sabdın «Eń belsendi bloger» nomınatsııasyna laıyq dep tanyldy. Jeńimpaz bloger sheteldik taǵylymdamada bolǵandyqtan marapat ýnıversıtettiń oqý-ádistemelik basqarmasynyń basshysy Jalǵas Sandybaevqa tabystaldy.
Sondaı-aq ýnıversıtet magıstranty jýrnalıst Gúlden Jandıldınova yntalandyrý syılyǵyna ıe boldy. Marapattaý barysynda Almaty qalasy Qoǵamdyq damý basqarma basshysynyń orynbasary Aıdar Esenbekov bul baıqaýdyń el ishindegi din taqyrybyn durys kóterip, dinı máselelerdiń durys sheshilip, halyqtyń rýhanı aǵartýshylyǵyn arttyrýda mańyzy baryna toqtaldy.
Almaty qalasy Qoǵamdyq damý basqarmasynyń «Monıtorıng jáne taldaý» ortalyǵynyń Dinı birlestiktermen jumys isteý bóliminiń meńgerýshisi Nurbolat Aıekeshov din salasynda kez kelgen jýrnalıstiń saýaty jete bermeıtinin jıi baıqaıtynyn atap ótti. Al Ulttyq jýrnalıstik zertteý ortalyǵynyń jetekshisi Dármen Smaıyl bul baıqaýdyń úsh jylda aýqymy artyp, túsken materıaldardyń da sapasy kóterilgenin aıta kele, bul baıqaýdyń dástúrli jalǵasy bolady degen sózderi saltanatty sharaǵa kelgen jýrnalıster men stýdentterge jańa serpin bere tústi.
