«Nur Múbárak» ýnıversıtetine jańa prorektor taǵaıyndaldy (FOTO)
Nur Múbárak ýnıversıteti Qamqorlar keńesiniń sheshimimen ǵalym, ǵylym doktory Qaırat Qurmanbaev atalǵan oqý ornynyń prorektory bolyp taǵaıyndaldy.
Egıpet Arab Respýblıkasy (EAR) astanasy Kaırde ótken Qamqorlar keńesiniń kezekti jıynynda osyndaı sheshim qabyldandy. Alqaly jıynǵa Qazaqstan Respýblıkasy Qoǵamdyq damý mınıstri Darhan Káletaev, Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz, ýnıversıtet prorektory, professor Shamshádın Kerim, Ábý Hanıfa ǵylymı zertteý ortalyǵynyń dırektory, PhD doktory Qaırat Qurmanbaev, sondaı-aq Mysyr tarapynan Ýaqyftar mınıstri, doktor Muhammed Muhtar Juma, ál-Azhar sheıhy, Nur Múbárak ýnıversıtetiniń rektory, professor Jýda Basıýnı, t.b. Qamqorlar keńesiniń quramy qatysty.
Ýnıversıtetke Qazaqstan tarapynan basshylyq jasap, eńbek sińirgen bilikti basshy, professor Shamshádın Kerim EAR Ýaqyftar mınıstrliginiń Qurmet gramotasymen marapattaldy.
Qaırat Qurmanbaev – ıslamtaný salasy boıynsha Lıvııa Arab Respýblıkasynda bakalavrıat deńgeıin támamdap, Ál-Farabı atyndaǵy Qazaq ulttyq ýnıversıtetinde magıstrlik dıssertatsııa qorǵaǵan. Keıin Nur-Múbárak ýnıversıtetinde doktorantýra bóliminde bilim alyp, elimizdegi ıslamtaný ǵylymy boıynsha eń alǵashqy ǵylymı dıssertatsııa qorǵaǵan PhD doktory. Birqatar ǵylymı eńbekteri, maqalalary men kitaptary jaryq kórgen.
Aıta keteıik, Qazaqstan men EAR arasyndaǵy kelisim boıynsha, Qamqorlar keńesiniń sheshimimen Nur Múbárak ýnıversıtetiniń rektor, prorektor qyzmetin eki eldiń ókilderi atqarady.
