Nur-Múbarak ýnıversıtetinde ıntellektýaldy saıys ótti (FOTO)
Nur-Múbarak ýnıversıtetinde ótken «Smart Student» ıntellektýaldyq saıysynda Aqtóbe, Baqanas, Talǵar, Shymkent qalalaryndaǵy daıyndyq kýrstarda oqıtyn shákirtter toby ózara baq synady.
Barlyǵy 5 komanda qatysyp, «Tanystyrý», «Súreni tap», «Sýretter boıynsha mátin qurastyrý» atty 3 bólim boıynsha dodaǵa tústi.
«Smart Student» ıntellektýaldyq saıysynyń maqsaty – ýnıversıtetke túsetin talapkerlerdiń bilimin jetildirý, ilim men ǵylymdy jan-jaqty taldaý, bilik daǵdylaryn anyqtaý, shapshań oılaý, tanymdyq qabiletterin arttyrý, ózderin erkin ustaı bilýge úıretý. Sebebi ishki oı, joǵary ınttelekt ár musylmanǵa qajetti qasıetter deıdi ýnıversıtet basshylary.
Uıymdastyrýshylardyń aıtýynsha, ár súrege suraq qoıý arqyly qoǵamdaǵy kez kelgen oqıǵaǵa jaýap taba alasyz. Eger de biz suraq qoıyp, oılanbasaq, osyǵan oraı jaýap bolmaýy múmkin. Saıystyń birinshi bóliminde qatysýshy súreni jan-jaqty túsindire bilýi eskerildi. Iaǵnı oqyǵan súre arqyly qoǵamdy kóre alý mańyzdylyǵyna toqtaldy.
Al ekinshi bóliminde sharıǵı salt-dástúr negizinde maqal-mátelder men suraq-jaýaptar qamtyldy. Odan ózge úshinshi bólimde sýrettegi beıneler arqyly oıyńyzdy jetkizý saraptaldy. Naqtylaı aıtqanda, oqıǵa aıatpen, hadıspen, maqal-máteldermen jetkizildi.
Zeıin men aqyl saıysyna Islamtaný kafedrasynyń meńgerýshisi PhD Nurlan Anarbaev, Arab jáne aǵylshyn tilder kafedrasynyń meńgerýshisi PhD Baǵdat Manabaev, sondaı-aq ıslamtanýshy-doktorant Baýyrjan Shaızan, Oqý ister jáne tirkeý bóliminiń meńgerýshisi Murathan Mahmet qazylyq jasady.
Tartysty saıys nátıjesinde I oryndy Aqtóbe qalasyndaǵy Daıyndyq kýrsy, II oryndy Shymkent qalasyndaǵy Daıyndyq kýrsy, III oryn Talǵar qalasyndaǵy uldar daıyndyq kýrsy, IV Baqanas eldi-mekenindegi daıyndyq kýrsy, V oryndy Talǵar daıyndyq kýrsynan kelgen qyzdar komandasy ıelendi.
Nur-Múbarak Egıpet ıslam mádenıeti ýnıversıtetiniń prorektory RhD, dotsent Qaırat Qurmanbaev «Saıysqa qatysqan ár úmitker – jeńimpaz» degen oıyn jetkizip, báıge júırikterine ýnıversıtet ujymy atynan alǵys jarııalady. Barlyq qatysýshyǵa sertıfıkat berilip, syı-syıapat kórsetildi.
