«Nur-Múbárak» shákirtteri Bas meshitpen tanysyp qaıtty (FOTO)

Elimizdiń irgeli dinı oqý ordasy «Nur-Múbárak» ýnıversıtetiniń shákirtteri ótken aptada Astana qalasyndaǵy respýblıkalyq «Áziret Sultan» meshitine at basyn tirep, qulshylyq ordasymen tanysyp qaıtty. Elimizdiń Bas meshitin arnaıy zııarat etip qaıtqan din jolyndaǵy shákirtter qulshylyq ordasynyń tynys-tirshiliginen habardar bolyp, tájirıbe ushtaı tústi.

Kúni erteń elimizdiń din salasynda qarymdy eńbek etip, qalyń jurtshylyqtyń rýhanı qajetine jaraýǵa bel býǵan shákirtter úshin bul sapardyń mán-mańyzy aıryqsha bolǵany sózsiz. Ýnıversıtet qabyrǵasynan túlep ushqaly otyrǵan olar úshin QMDB Apparat basshysy Ǵılymbek Májıevpen ótken kezdesýdiń tipten orny bólek boldy. Asyl dinimizdiń jolynda halyqqa qaltqysyz qyzmet jasaýdyń qıyndyǵy men mashaqatyn, ımam men ustaz degen abyroıly attyń aýyrlyǵy jaıynda aıtyp ótken Apparat basshysy bolashaq mamandarǵa izgi tilegin aıtyp, tájirıbe-keńesterimen bólisti.

Kezdesýden soń «Nur-Múbárak» shákirtterine arnaıy dastarhan jaıylyp, meshit qyzmetkerlerimen emin-erkin áńgime jelisi órbidi. Aǵalyq aqyl aıtylyp, jaýapty da saýapty qyzmet jaıynda kózimen kórip, kóńilge oı túıgen shákirtter úshin bul kúnniń sanada saqtalyp qalary anyq.

Sýretterdi «FOTOGALEREIa» aıdarynan kóre alasyzdar!