«Sheıh Kýnta qajy» meshitine jańa bas ımam taǵaıyndaldy (FOTO)

Búgin, qasıetti juma kúni Astana qalasyndaǵy «Sheıh Kýnta qajy» meshitine jańa bas ımam taǵaıyndaldy. QMDB tóraǵasynyń birinshi orynbasary, naıb múftı Naýryzbaı qajy Taǵanuly juma namazyna jıylǵan jamaǵatqa Bas múftı Serikbaı qajy Orazdyń buıryǵyn oqyp berip, jańa bas ımam Erejepov Sábıt Ázimbaıulyn tanystyrdy.

Bul súıinshi jańalyqty meshit jamaǵatymen bólisýge naıb múftı Naýryzbaı qajy Taǵanulymen birge QMDB Nasıhat jáne qoǵammen baılanys bóliminiń meńgerýshisi Altynbek Utyshanuly, Astana qalasynyń ókil ımamy Asqar Muqanov bastaǵan dinı qyzmetkerler kelip, qasıetti juma qatysty.

Osydan jeti jyl buryn jamaǵatqa esigin aıqara ashqan «Sheıh Kýnta qajy» meshitiniń alǵashqy bas ımamy bolyp Jaqııa qajy Ismaılov taǵaıyndalǵan bolatyn. Osy ýaqyt ishinde talaı irgeli isterdiń uıytqysy bolyp, jamaǵat alǵysyna bólengen Jaqııa qajy Ismaılovpen jamaǵat qımaı qoshtasyp, óz rızashylyqtaryn jetkizip jatty. Jamaǵat aldynda Jaqııa qajynyń din salasyndaǵy eren eńbekterin atap ótken naıb múftı Naýryzbaı qajy Taǵanuly Sábıt Ázimbaıulyna quttyqtaý lebizin bildirip, jańa jumysyna sáttilik tiledi.

«Bul qyzmettiń jaýapkershiligi joǵary. Áýeli Allanyń aldyndaǵy jaýapkershilik bar. Alla sizge jar bolsyn. Jamaǵatyńyzǵa shynaıy mahabbatpen, syılastyqpen, aıryqshp yqylaspen qyzmet etýdi násip etsin. Qasıetti Shaǵban aıynda Ramazan aıynyń qarsańynda taǵdyryńyzda osyndaı ózgerister bolyp jatyr. Alladan sáttilik tileımin»,  - dedi naıb múftı Naýryzbaı qajy Taǵanuly.