Naýryzbaı Taǵanuly «Nur Astana» meshitinde juma ýaǵyzyn aıtty (FOTO+VIDEO)
Búgin Elorda tórindegi «Nur Astana» meshitinde QMDB tóraǵasynyń birinshi orynbasary, naıb múftı, Nur-Sultan qalasynyń bas ımamy Naýryzbaı qajy Taǵanuly «Salıqaly urpaq – ult bolashaǵy» taqyrybynda juma ýaǵyzyn aıtty.
Kúnderdiń sultany bolǵan qasıetti jumada «Nur Astana» meshitiniń jamaǵatymen júzdesip, tildesý úshin arnaıy at basyn burǵan QMDB-nyń birinshi naıb múftıi Naýryzbaı qajy Taǵanuly salıqaly urpaq tárbıeleýdiń mán-mańyzyna toqtaldy.
Urpaq tárbıesi qaı kezeńde bolmasyn, qaı elde bolmasyn ult bolashaǵynyń birden-bir negizi. Keler násildiń tárbıesine otbasy - oshaq qasynan bastap, qorshaǵan orta, qoǵam túgel jaýapty. Degenmen, keıde otbasynda eskerilýi kerek qarapaıym qaǵıdattarǵa mán berilmeı, «jas shybyq qısyq bitip, talaı ata-ana «átteń-aı!» dep sanyn soǵyp jatady. Osy oraıda
Naýryzbaı qajy Taǵanuly bala tárbıesinde mańyzy bar birqatar qarym-qatynas erejelerine toqtalyp ótti.
«Bala tárbıesinde eskerilýi tıis máseleler:
Birinshiden, oǵan sózben emes, ispen úlgi bolý. «Aıtpa – kórset, úndeme – úıret!» degen prıntsıp osyndaıda aýadaı qajet.
Ekinshiden, jumsaqtyq qajet. Bala ata-anasynan jylýlyq sezinbeıinshe, onyń boıynda meıirim-mahabbat oıanbaıdy.
Úshinshiden, keıde qataldyq ta qajet. Qatal bolǵanda da óz ornymen. «Qatal bol, biraq qatygez bolma!» degen tujyrym bar. Ol óziniń ádepsiz áreketi úshin ákesiniń ashýlanatynyn bilýi kerek.
Tórtinshiden, balamen úlken adamdarsha pikirlesý, sóılesý lázim.
Besinshiden, bala tárbıesimen júıeli túrde aınalysý qajet. Aptasyna bir ýaqytty arnaý – onyń tárbıesin júıeli qadaǵalaýǵa múmkindik beredi.
Altynshy, onyń qolymen qaıyrly isterdi jasaý.
Jetinshi, syılyq berý. Syılyq – kez kelgen júrekti jibitedi.
Segizinshi, duǵagóılik. Igi urpaqty, qulshylyǵy men tirshiligi úılesken úlgili balany Alladan tileý – ár musylmannyń mindeti.
Toǵyzynshy, balalardy alalamaý, bárine birdeı qaraý, birdeı kóńil bólý qajet», - deı otyryp dinnen ónegeli sózderdi tilge tıek etti.
Namaz sońynda, juma ýaǵyzyna tánti bolǵan meshit jamaǵaty naıb múftıge dán rızashylyqtaryn bildirdi.
