Naýryzbaı qajy Taǵanuly «Jýsan» operatsııasymen oralǵandarǵa nasıhat aıtty (FOTO)
Búgin QMDB tóraǵasy, Bas múftı Naýryzbaı qajy Taǵanuly Rýhanı kelisim kúnine oraı «Jýsan» operatsııasymen elge oralǵan atyraýlyq áıeldermen kezdesti.
Bas múftı Naýryzbaı qajy Taǵanuly kezdesýde kezinde adasyp, elden jyraq ketip, keıin gýmanıtarlyq operatsııamen elge esen oralýdyń ózi – úlken nyǵmet, Allanyń bergen syıy, memleketimizdiń qamqorlyǵy ekendigin atap ótti.
«Qazaq eshýaqytta jetimin jylatpaǵan, jesirin qańǵytpaǵan halyq. Qazaq baýyryn ókpege qısa da, ólimge qımaǵan ult. Operatsııanyń «Jýsan» dep atalýynyń ózi qandaı keremet. Kezinde musylman memleketin basqarǵan Beıbarys sultan babamyz da jýsan ıisin saǵynǵan eken. Jýsan – ol týǵan el, Otanymyzdyń sımvoly. Ázız Paıǵambarymyz da (oǵan Allanyń salaýaty men sálemi bolsyn) dushpandary qýmasa, Mekkeden ketpeıtinin aıtqan edi. Ókinishke qaraı, bizdiń kóptegen qarakózderimiz soǵys dalasyna attanyp, qaza boldy. Jáýteńdegen búldirshinder japa shekti. Ásilinde din soǵyspen jaıylmaıdy. Din nasıhatpen órkendeıdi» dep atap ótti Bas múftı.
Sondaı-aq «Jýsan-2» operatsııasymen elge oralǵandar óz kezeginde jańa ómir, jańa múmkindik syılaǵan memleket basshylyǵyna, osy isti uıymdastyrýshylarǵa rızashylyǵyn bildirdi.
«Qazaqstanǵa oralǵanymyzǵa Allaǵa sansyz shúkirshilik etemiz. Buryn elge degen kózqarasymyz basqasha bolǵan edi. Qazir Otanymyzǵa degen qurmetimiz artty. Sizderge Alla razy bolsyn» dedi elge kelgen Perızat Jaqsylyqqyzy.
Aıta ketý kerek, Atyraý oblysyna «Jýsan» operatsııasymen 21 áıel adam, 75 bala oraldy.
Atyraý oblystyq «Imanǵalı» meshitinde ótken kezdesýge QMDB Apparat basshysy Ǵylymbek Jádigeruly, QMDB Sharǵıat jáne pátýa bóliminiń meńgerýshisi Sansyzbaı Qurbanuly jáne óńirdiń bas ımamy Altynbek Utyshanuly qatysty.
Kezdesý sońynda Bas múftı Naýryzbaı qajy Taǵanuly «Jýsan» operatsııasymen oralǵandarǵa azyq-túlik paketi men kitap tabys etti.
