Naýryzbaı qajy Taǵanuly jas sportshylarǵa aq jol tiledi (FOTO)

Qarasha aıynyń 10-18 juldyzy aralyǵynda Mońǵolııa astanasy Ýlan-bator qalasynda bokstan jastar arasyndaǵy Azııa birinshiligi ótetin bolmaq. Dúbirli dodaǵa elimizdiń namysyn qorǵaý úshin saıdyń tasyndaı iriktelgen 10 boksshymyz qatysatyn bolmaq. Elimizdiń ár túkpirinen jıylǵan jas sportshylarymyz qazirgi ýaqytta Nur-Sultan qalasynda bas qosyp, jarys aldyndaǵy daıyndyqtaryn pysyqtaý ústinde.

Aıtýly sapar aldynda el aǵalarynyń aq batasyn alyp, aqyl-keńesterine júginýdi kup kórgen Qazaqstan Boks federatsııasynyń mamandary arnaıy kezdesý uıymdastyryp, jas boksshylarymyzdy jigerlendire tústi. El namysyn qorǵaýǵa attanǵaly turǵan jastarymyzǵa QMDB tóraǵasynyń birinshi orynbasary, naıb múftı Naýryzbaı qajy Taǵanuly, Qazaqstannyń eńbek sińirgen sport sheberi, Olımpıada oıyndarynyń eki dúrkin kúmis júldegeri Bolat Jumadilov jáne elimizge belgili bapkerler quramy aq tilekterin bildirip, sáttilik tiledi.

Bokstan QR jasóspirimder ulttyq quramasynyń aǵa jattyqtyrýshysy Qaırat Sátjanovtyń aıtýynsha, Mońǵolııa jerindegi jarysqa elimizdiń atynan 10 boksshymyz qatysatyn bolmaq.

«Jastarymyzdyń jarysqa degen daıyndyǵy óte myqty. Alaıda, ata-babamyz «aryq sóılep, semiz shyq» degen emes pe?! Aldyńǵy Azııa birinshiliginde 6 sportshymyz top jarǵan bolatyn. Bıyl da osy mejeden taımaı, júldeli oralýǵa tyrysamyz», – deıdi  Qaırat Tursynhanuly.