Naýryzbaı qajy Taǵanuly qarılarmen kezdesý ótkizdi (FOTO)

Búgin QMDB tóraǵasynyń birinshi orynbasary, naıb múftı, respýblıkalyq «Áziret Sultan» meshitiniń bas ımamy Naýryzbaı qajy Taǵanuly qasıetti Ramazan aıy boıy Bas meshitte Quran hatym etken qarılarmen kezdesý ótkizdi. Qasıetti aı boıy Bas meshit jamaǵatyna taraýıh namazdarynda ımamdyq etip, Alla sózin júrekterge jetkizgen qarılarymyz keshe, qasıetti Qadir túni Quran hatymdy aıaqtap, duǵasy jasalǵan bolatyn.

Aıta keteıik, bıylǵy respýblıkalyq «Áziret Sultan» meshitindegi taraýıh namazdaryna elimizge belgili qarılar Ersin Ámire, Jumanazar Óserhanuly jáne Murtaza Ertaıuly  ımamdyq etken bolatyn. Elimizdiń mańdaıaldy qarılary Bas meshit jamaǵatyna taraýıh namazdaryn ǵana ótip qoımaı, ýaǵyz-nasıhat jumystaryn da júrgizip, Ramazan aıynyń berekeli ótýine úles qosty.

Quran bilgirleriniń ynta-yqylasy men kórsetken eńbegi úshin Bas meshit ujymy atynan Bas ımam Naýryzbaı qajy Taǵanuly rızashylyǵyn bildirip, arnaıy «Alǵys hat» tabystady. Meshit ımamdarymen ótken májilis barysynda izgi tilekter aıtylyp, duǵa jasaldy.

Sýretterdi «FOTOGALEREIa» aıdarynan kóre alasyzdar!