NAÝRYZBAI QAJY TAǴANULY MYSYR MÚFTIIMEN KEZDESTI
Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Mysyr eline jasaǵan sapary aıasynda Mysyr Arab Respýblıkasynyń Bas múftıi Nazır Aıad myrzamen kezdesti.
Kezdesý barysynda taraptar ıslam qundylyqtaryn dáripteý, pátýa berý isindegi ózara yntymaqtastyqty nyǵaıtý, sondaı-aq qazirgi zaman talaptaryna saı dinı máselelerge ǵylymı negizdelgen ortaq ustanym qalyptastyrý baǵyttaryn talqylady.
Bas múftı Naýryzbaı qajy Taǵanuly Mysyr eliniń ıslam órkenıetindegi orny aıryqsha ekenin atap ótip, ǵasyrlar boıy fıqh, aqıda, tápsir jáne hadıs ilimderiniń damýyna súbeli úles qosqan ǵylymı mektepterdiń búgingi kúni de musylman álemine baǵyt-baǵdar berip otyrǵanyn jetkizdi.
Kezdesýde jahandyq syn-qaterler jaǵdaıynda pátýa berý jaýapkershiliginiń arta túskeni sóz boldy. Atap aıtqanda, zamanaýı salalarda týyndaıtyn máseleler boıynsha birlesken ǵylymı pátýalar ázirleý, ǵalymdar arasynda tájirıbe almasý jáne turaqty ǵylymı dıalog ornatý qajettigi aıtyldy.
Taraptar QMDB qyzmetkerleri men qazaqstandyq jas ǵalymdar úshin Mysyr múftııaty, «Dar ál-Ifta» jáne ál-Azhar oqý oryndary bazasynda taǵylymdamalar men qysqa merzimdi oqý baǵdarlamalaryn uıymdastyrý máselesin de talqylady.
Kezdesý sońynda taraptar eki el arasyndaǵy ózara túsinistik pen senimge negizdelgen yntymaqtastyq aldaǵy ýaqytta da nyǵaıa túsetinine senim bildirdi.
