Naýryzbaı qajy Taǵanuly Mysyr múftıimen birqatar máseleni talqylady (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Kaırde Mysyr múftıi Shaýqı Allammen kezdesip, birqatar máseleni talqylady.

Kezdesýge Qazaqstannyń Mysyr Arab Respýblıkasyndaǵy Tótenshe jáne Ókiletti elshisi Qaırat Lama Sharıf, QMDB Apparat basshysy Ǵylymbek Májıev, Ýaǵyz-nasıhat bóliminiń meńgerýshisi Batyrjan Berdenuly, Dinı bilim jáne kadr daıarlaý bóliminiń meńgerýshisi Smaıyl Seıitbekov, Aqparat jáne qoǵammen baılanys bóliminiń meńgerýshisi Marat Bektazınov qatysty.

Bir saǵatqa sozylǵan kezdesýde musylman jamaǵatyn alańdatqan máseleler, atap aıtqanda, ıpotekamen úı alý, dinı merekelerdi bekitý, óz elinde keń taraǵan mázhabty ustaný syndy jaǵdaıattar jan-jaqty talqylandy. Taraptar osy baǵytta ortaq pátýa qabyldaýǵa ýaǵdalasty.

Bas múftı Naýryzbaı qajy Taǵanuly Mysyr múftıi Shaýqı Allamǵa izgi nıetin jetkizip: «Siz Qazaqstan musylmandary dinı basqarmasynyń bastamalaryna qoldaý kórsetip kelesiz. Osy rette Sizge erekshe iltıpatymdy jetkizemin. 

Mysyr eli jyl saıyn Qazaqstan musylmandary dinı basqarmasyna 25 bilim grantyn bóledi. Mysyrda bilim alyp kelgen din ǵalymdary elimizdiń ıgiligi men Islam dininiń damýyna ózindik úlesin qosýda.   

Bul kelisim eki eldiń dinı saladaǵy baılanysyn arttyra tústi. Bul baǵyttaǵy áriptestik baılanysymyz jalǵasa beredi degen senimdemin» dep atap ótti.

QMDB Tóraǵasy Mysyr múftıin «Qazaqstan musylmandary dinı basqarmasyna 30 jyl» merekelik medalmen marapattap, arnaıy alǵys hatyn tabystady.