Naýryzbaı qajy Taǵanuly Bas Múftı bolyp saılandy (Foto)
Búgin Nur-Sultan qalasynda ótken Qazaqstan musylmandary dinı basqarmasynyń kezekten tys IH Quryltaıynda Serikbaı qajy Oraz QMDB tóraǵasy, Bas múftı qyzmetine Naýryzbaı qajy Taǵanulynyń kandıdatýrasyn usyndy.
Quryltaıǵa jınalǵan 300 delegat Serikbaı qajy Orazdyń usynǵan kandıdatýrasyna biraýyzdan daýys berip, qoldaý kórsetip, Naýryzbaı qajy Taǵanulyn Bas múftılikke saılady.
«Naýryzbaı qajy Taǵanuly meniń birinshi orynbasarym retinde kóptegen ıgi jobalardy júzege asyrdy. Dinı salada tájirıbesi mol. Naýryzbaı qajy Taǵanulynyń Dinı basqarma jumysyn jandandyryp, jańa bastamalarǵa uıytqy bolatynyna senemin», – dep atap ótti.
Quryltaıǵa qatysqan QR Aqparat jáne qoǵamdyq damý mınıstri Dáýren Abaev Serikbaı qajy Orazdyń 2017-2020 jyldary atqarǵan jumysyna oń baǵa berip, QMDB tóraǵasy, Bas múftı Naýryzbaı qajy Taǵanulynyń jańa qyzmetine sáttilik tiledi. Sonymen qatar, dinı saladaǵy ortaq sharalardy birlese júzege asyrýǵa nıettestik bildirdi.
QMDB tóraǵasy, Bas múftı Naýryzbaı qajy Taǵanuly jýrnalısterge bergen suhbatynda: «Quryltaıǵa elimizdiń ár oblysynan kelgen 300 delegat meniń kandıdatýrama daýys berip, senim bildirip, Bas múftı laýazymyna saılady. Bul senimdi abyroımen aqtaýǵa bar kúsh-jigerimdi jumsaımyn. Josparlap otyrǵan birqatar jumystarymyz bar. Ózderińiz bilesizder, 2020 jyldyń 12 qańtarynda Qazaqstan musylmandary dinı basqarmasynyń qurylǵanyna 30 jyl toldy. Osy mereıtoı aıasynda 30 meshitke el ıgiligi jolynda qyzmet etken tulǵalardyń, sonyń ishinde ál-Farabı men Abaıdyń esimin berýdi, 30 eldi-mekenniń aýyz sý, jol-kópir máselesine oń yqpal etýdi, 30 otbasyǵa qaıyrymdylyq jasaýdy, 30 stýdentke grant taǵaıyndaýdy, 30 meshitke kúrdeli jóndeý júrgizýdi, t.b. ıgi is-sharalardy júzege asyrýdy josparlap qoıdyq. Barsha jamaǵatty saýapty isti birlese atqarýǵa shaqyramyn», – dep atap ótti.
Aıta ketsek, Naýryzbaı qajy Taǵanuly osyǵan deıin QMDB tóraǵasynyń Birinshi orynbasary, «Áziret Sultan» meshitiniń Bas ımamy qyzmetin atqardy.
ÓTPENOV NAÝRYZBAI TAǴANULY
1977 jyldyń 13 naýryzynda dúnıege kelgen.
Bilimi
1993-1997 jyldary Tashkenttegi «Imam Ál-Buharı» atyndaǵy Islam ınstıtýtynda oqyp joǵarǵy dinı bilim alǵan.
1999-2001 jyldary QMDB janyndaǵy Islam ınstıtýtyn oqyǵan.
2009 jyly Mysyr Arab Respýblıkasynda qysqa merzimde dinı bilimin jetildirgen.
2010 jyly Abaı atyndaǵy Almaty Memlekettik ýnıversıtetiniń «Tarıh» fakýltetin syrttaı oqyp bitirip joǵarǵy bilim alǵan. 2011-2013 jyldary atalǵan ýnıversıtettiń «Dintaný» mamandyǵy boıynsha magıstratýrasyn bitirgen.
2017 jyldan bastap «Nur-Múbarak» Egıpet ıslam mádenıeti ýnıversıtetinde «Islamtaný» mamandyǵy boıynsha PhD doktorantýrasynda oqýda.
Eńbek joly:
1997-2006 jyldary Respýblıkamyzdyń túrli meshitterinde ımamdyq qyzmetterdi atqarýmen bastaý alǵan.
2006-2011 jyldary QMDB-nyń Qaraǵandy óńirindegi ókili, Qaraǵandy qalalyq №1 ortalyq meshitiniń Bas ımamy.
2011-2013 jyldary Qazaqstan Respýblıkasy Din isteri agenttiginiń Dinı birlestiktermen baılanystar jónindegi basqarmasynyń Bas sarapshysy.
2013-2018 jyldary QMDB tóraǵasynyń birinshi orynbasary, naıb múftı, QMDB-nyń Astana qalasy boıynsha ókili, «Nur Astana» ortalyq meshitiniń Bas ımamy.
2018 jyldyń shilde-qazan aılary QMDB tóraǵasynyń birinshi orynbasary, naıb múftı, QMDB-nyń Túrkistan qalasyndaǵy keńse basshysy, Túrkistan oblysy boıynsha ókili ımamy.
2018 jyldyń qazan aıynan bastap QMDB tóraǵasynyń birinshi orynbasary, naıb múftı, QMDB-nyń Nur-Sultan qalasy boıynsha ókili, Respýblıkalyq «Áziret Sultan» meshitiniń Bas ımamy.
Eńbek jolyndaǵy jetistikteri:
Naýryzbaı Taǵanulynyń tikeleı jetekshiligimen 2002-2005 jyldary ShQO, Aıagóz qalasynda ortalyq jáne «Jańaýyl» meshitteriniń qurylysy sátti júrgizilip, iske qosylǵan. 2010-2011 jyldary Qaraǵandy qalasyndaǵy ortalyq meshittiń salynýyna úles qosqan. Qaraǵandy oblysynda «Sulý álem», «Nurly minber», «Juldyzdy gol» atty jobalardy iske asyrǵan. Respýblıkalyq BAQ betterinde jarııalanǵan kóptegen dinı, rýhanı-tanymdyq maqalalar men «Úmit sáýlesi», «Mazhabsyzben suhbat» atty kitaptardyń avtory.
Marapattary:
«Qurmet» ordeniniń ıegeri, Aıagóz aýdanynyń qurmetti azamaty, Qazaqtan Táýelsizdiginiń 20 jyldyǵy medalimen, Qazaqtan Táýelsizdiginiń 25 jyldyǵy medalimen, Qaraǵandy oblysy ákiminiń qurmet gramotasymen, Nur-Sultan qalasy ákimderiniń alǵys hattarymen marapattalǵan.
Jeke ómiri:
Otbasyly, 4 balanyń ákesi.
