Naýryzbaı qajy Taǵanuly Ankara saparynyń nátıjesi týraly málimdedi (FOTO)

Túrkııa astanasy Ankara qalasynda Din isteri basqarmasynda Naýryzbaı qajy Taǵanulynyń tóraǵalyǵymen alqaly jıyn ótti.

Jıynǵa Bas múftı keńesshisi Baltabaı Mekejanov, Sharıǵat jáne pátýa bóliminiń meńgerýshisi Sansyzbaı Qurbanuly, Nasıhat jáne qoǵammen baılanys bóliminiń meńgerýshisi Altynbek Utyshan, Baspa jáne aýdarma bóliminiń meńgerýshisi Murat Manapuly, Qajylyq bóliminiń meńgerýshisi Jándilla Bekjigitov, baspasóz hatshysy Aǵabek Qonarbaıuly qatysty.

Basqosýda QMDB qyzmetkerleriniń Túrkııaǵa resmı sapary, onyń ishinde Bas múftı Serikbaı qajy Orazdyń Túrkııa din isteri basqarmasynyń tóraǵasy, professor Álı Erbashpen kezdesýinde sóz bolǵan máseleler talqylandy. Naýryzbaı qajy Taǵanuly ekijaqty kelissózderdiń joǵary deńgeıde ótkenin aıryqsha atap ótti. Bul kezdesý baýyrlas elderdiń baılanysyna serpin beretinin tilge tıek etti.

Aıta ketsek, búginde Túrkııada QMDB-nyń 47 din qyzmetkeri bilimin shyńdaýda. Bul baǵyttaǵy biliktilikti arttyrý sharasy jalǵasyn taba bermek.

Jıyn sońynda Naýryzbaı qajy Taǵanuly QMDB qyzmetkerlerine birqatar hattamalyq tapsyrmalar berdi. Sonymen qatar, túrkııalyq áriptesterge birlesken jobalar jaıly usynys berý qajettigin atap ótti.