NAÝRYZ MEREKESI QUTTY BOLSYN!

Naýryzbaı qajy TAǴANULY

QMDB Tóraǵasy, Bas múftı 

Qadirli otandastar!

Barshańyzdy Ulystyń Uly kúni – Naýryz meıramymen shyn júrekten quttyqtaımyn! Bizdiń babalarymyz tól jańa jylymyzdyń bastaýy sanalatyn, tabıǵatqa jan bitirip, tirshilikti túletetin Naýryz meıramyna erekshe mán bergen. Sebebi babalarymyz Naýryzdy – jańashyldyqqa umtylýdyń, jańǵyrýdyń nyshany dep qabyldaǵan. Sodan bolar, berer taǵylymy mol, tarıhy tereńde jatqan Naýryz meıramyn el bolyp asyǵa kútemiz.

Ejelden ıgi dástúrimizge aınalǵan Ulystyń Uly kúni – izgilik pen meıirimniń meıramy. Óıtkeni bul kúni halqymyz bulaqtyń kózin ashyp, aǵash egip, bir-birin quttyqtap, bir-birine izgi tilegin arnaıdy. Renjiskender bir-birin keshirip, meıirimdilik tanytady.

Aqsaqaldardyń «Ulys oń bolsyn, aq mol bolsyn!» degen tileginiń taǵylymy zor. 

Ardaqty aǵaıyn!

Osynaý shýaqty merekede ár otbasyǵa baqyt pen birlik, tatýlyq pen bar jaqsylyqty tileımin. Alla Taǵala halqymyzǵa amandyq, jurtymyzǵa tynyshtyq násip etsin! Ulys oń bolsyn, aq mol bolsyn! Ámın!