Nasıhat tobyna trenıng ótkizildi (FOTO)

Elordada Qazaqstan musylmandary dinı basqarmasynyń akt zalynda Jergilikti aqparattyq-nasıhat tobyna arnalǵan semınar-trenıng ótkizildi. Jıyndy QMDB tóraǵasynyń birinshi orynbasary, naıb múftı Naýryzbaı qajy Taǵanuly ashyp, ýaǵyz-nasıhat jumysyn jandandyrýǵa qatysty birqatar oılarymen bólisti. Jıyndy QMDB Nasıhat jáne qoǵammen baılanys bóliminiń meńgerýshisi PhD doktor Batyrjan Mansurov júrgizdi.  

«Aqparattyq-nasıhat tobyna júktelgen mindet úlken. Óıtkeni, bul – nasıhat salasynda úlken jumystardy atqaryp kele jatqan top. Bul topqa qabyldanǵan ımamdardyń 70 paıyzy joǵary bilimdi. Budan baıqaıtynymyz, elge aıtylar ýaǵyzdyń sapaly bolýy din qyzmetkeriniń bilimine baılanysty», – dep atap ótti.

Jıynda QMDB baspasóz hatshysy Aǵabek Qonarbaıuly buqaralyq aqparat quraldarymen jumys, maqala jarııalaý ádisteri, áleýmettik jelini tıimdi paıdalaný taqyryptarynda trenıng júrgizdi.

Nasıhat tobyna elimizdiń túkpir-túkpirinen saraptamadan ótken 420 dinı qyzmetker engen. Atalǵan nasıhat toby jyl basynan beri destrýktıvtik jat aǵymnyń aldyn alý boıynsha memlekettik mekemelerde 379 kezdesý ótkizip, oǵan 20 myńnan asa adam qatysqan. Otyrys barysynda jergilikti aqparattyq-nasıhat tobynyń jarty jyldyq esebi tyńdaldy. Ony QMDB nasıhat jáne qoǵammen baılanys bóliminiń mamany Hamzat Ádilbekov baıandady.

Jıyn sońynda Naýryzbaı qajy Taǵanuly jumysta jyl basynan beri belsendilik tanytqan ımamdarǵa Bas múftıdiń alǵys hatyn tabystady.