Naıb múftı: Orazanyń muraty – rýhanı órleý, taqýalyqqa jetý

Naıb múftı Naýryzbaı qajy Taǵanuly «Nur Astana» meshitinde senbilik ýaǵyz aıtty. Qazaqstan musylmandary dinı basqarmasynyń Tóraǵa orynbasary, naıb múftı, QMDB-nyń Nur-Sultan qalasy boıynsha ókili, respýblıkalyq «Áziret Sultan» meshitiniń Bas ımamy Naýryzbaı qajy Taǵanuly Ramazan aıyna oraı, meshit jamaǵatymen júzdesip, «Orazanyń qasıeti men bereketi» taqyrybynda ýaǵyz aıtty.

«Árbir Ramazanǵa jasalǵan qurmet kúnániń keshirilýimen, Jánnatpen súıinshilenedi. Osydan Ramazan aıynyń qandaı qasıetti aı ekenin túsine bersek bolady. Qurmetti momyndar! Bul oraza – Allanyń úlken syıy. Bul aıda aspan esikteri ashylady. Demek, duǵa qabyl bolady degen sóz. Tozaq esikteri jabylady, jyn men shaıtan kisendeledi. Iaǵnı, pendeniń jánnattyq amaldar jasaýyna búkil múmkindikter beriledi. Atalarymyz bata bergende «Álhamnyń» berekesin ber, «Qý hý Allanyń» qýatyn bersin! Qydyrmen joldas et, orazamen ottas et» deıtin. Máshhúr Júsip atamyzdyń «Orazamen qoshtasý» degen jyry bar. Halqymyzdyń orazaǵa mahabbaty osylaı bolǵan. Orazanyń muraty tek iship-jeýden tyıylý ǵana emes, rýhanı órleý, taqýalyqqa jetý», - dedi Naýryzbaı qajy Taǵanuly.

Naıb múftı jınalǵan jamaǵatqa Ramazan aıynyń artyqshylyqtary men berekesi jaıynda tushymdy nasıhat jasap, qasıetti aıdy ǵanıbet bilýge úndedi.