«Musylman zıratynyń tártibi jáne ádepteri» atty semınar ótti (FOTO)
Nur-Sultandaǵy Qazaqstan musylmandary dinı basqarmasynyń ǵımaratynda «Musylman zıratynyń tártibi jáne ádepteri» atty semınar ótti.
Semınarǵa QMDB-nyń Tóraǵasy, Bas múftı Serikbaı qazy Oraz, QMDB tóraǵasynyń orynbasary, naıb múftı Ershat Ońǵarov, Sharıǵat jáne pátýa bóliminiń basshysy Sansyzbaı Qurbanuly, Nasıhat jáne qoǵammen baılanys bóliminiń basshysy Batyrjan Mansurov, Qaıyrymdylyq jáne ýahyp isteri bóliminiń basshysy Kamaljan Turdybaev, Halal ónimderin standarttaý bóliminiń basshysy Smaıyl Seıitbekov, sondaı-aq bólim mamandary men barlyq oblystyń pátýaǵa jaýapty qyzmetkerleri qatysty.
Alǵashqy sózdi alǵan Bas múftı pátýa berýdiń dinı jáne qoǵamdyq jaýapkershiligine toqtalyp, semınar jumysynyń mańyzyn tilge tıek etti. Sonymen birge, salt pen dástúrdiń sabaqtastyǵyn, mamandarǵa bilim men biliktilikti únemi arttyrý qajettiligin aıtty.
Jıynda Qazaqstandaǵy qazirgi zırattardyń jaǵdaıy baıandaldy jáne jeltoqsan aıynyń basynda Ǵulamalar Keńesinde qabyldanǵan «Musylman zıratynyń tártibi men ádepteri», «Qudaı as berý tártibi» atty qujattar tanystyryldy. Ony halyqqa jetkizý joldary, ádis-tásilderi talqylandy. Sondaı-aq, rıtýaldyq qyzmet kórsetý mekemeleriniń jumysyn retteý jáne qudaıy as-mázirlerin birizdilikke túsirý jóninde naqty usynystar berý tapsyryldy.
Tústen keıin jınalystyń ekinshi bóliginde 2019 jyly atqarǵan pátýa jumysynyń qorytyndy esebine taldaý jasaldy. Kelesi jyldyń jospary, pátýa jumysynyń baǵyt-baǵdary túsindirildi. Semınar sońynda ótken jyldyń jumysy boıynsha jaqsy nátıje kórsetken pátýaǵa jaýapty qyzmetkerler men bólim mamandaryna arnaıy sertıfıkat tabys etildi.
