«Munara» gazeti baıqaý jarııalaıdy
![](/img/news/830bb8a0e6cf0cd284b87069b2255664.jpg)
Halqymyzdyń birtýar perzenti, qazaq jazba ádebıetiniń negizin qalaýshy, uly aqyn, ǵulama-oıshyl Abaı Qunanbaıulynyń 175 jyldyǵyna oraı «Munara» gazeti avtorlar men oqyrmandar arasynda «Abaı sózi – urpaq temirqazyǵy» atty shyǵarmashylyq baıqaý jarııalaıdy.
El Prezıdenti Qasym-Jomart Toqaev «Abaı jáne HHI ǵasyrdaǵy Qazaqstan» maqalasynda «Abaı murasy – bizdiń ult bolyp birlesýimizge, el bolyp damýymyzǵa jol ashatyn qasterli qundylyq» deı kele, «bıylǵy báıgeler Abaı shyǵarmashylyǵyna arnalady» dep aıryqsha atap ótken bolatyn. Osy oıdy qýattaı otyryp Qazaqstan musylmandary dinı basqarmasynyń qoldaýymen «Munara» gazeti Abaı shyǵarmashylyǵyna arnalǵan baıqaý uıymdastyrdy.
Baıqaýdyń maqsaty – Abaıdyń asyl sózin, mol murasyn zerttep-zerdelep, gazet oqyrmandaryna dáripteý.
Aqynnyń ǵıbratty ǵumyry men shynaıy shyǵarmashylyǵyn ult bolyp birlesýimizge, el bolyp damýymyzǵa jol ashatyn qasterli qundylyqqa aınaldyrýǵa úles qosý. Sebebi Abaıdyń oı-tujyrymdary áli kúnge ózektiligin joıǵan emes. Abaı shyǵarmashylyǵy – adamzatqa arnalǵan rýhanı azyq. Sol sebepti baıqaýdy uıymdastyrýdaǵy maqsat, Prezıdent aıtqandaı, «Abaıdyń oıynan da, toıynan da taǵylym alý».
Baıqaýdyń mindeti – gazet oqyrmandaryna motıvatsııa berip, shyǵarmashylyq izdenisin arttyryp, Abaı álemi aıasynda oı qorytýǵa shaqyrý.
Abaı álemi – úlken qubylys. Alaıda biz Abaı muralaryn qalaı qabyldadyq? Aqyn jyrlarynan ne túıdik? Qara sózderinen qandaı ǵıbrat aldyq? Abaı shyǵarmashylyǵynda aıtylǵan din men dúnıetanym, rýh pen minez, turmys pen tirshilik, bolmys pen bitim, til men dil taqyryptaryn qalaı tarazylap júrmiz? Oıshyldyń «Tolyq adam» kontseptsııasyn qalaı qabyldadyq? Abaı aıtqan «Kámil musylman» uǵymy neni bildiredi? Aqynnyń bizden kútken, talap etken nársesi ne? Ony oryndaı aldyq pa? Abaı súısingen, kúıingen dúnıeler qandaı edi? Olardan nendeı tálim aldyq? Zańǵar jazýshy Muhtar Áýezovtiń «Abaı joly» romanyn oqyǵanda qandaı áser aldyq? Jalpy, Abaı tulǵasy qanshalyqty dáripteldi? «Munaranyń» oqyrmandary hám avtorlarynan osyndaı oı tóńiregindegi tolǵanystar kútemiz. Abaıdyń áli kúnge ashylmaǵan syrlary men qyrlary, ómir joly, shyǵarmashylyǵy, qazaq mádenıetin damytýdaǵy róli hám artyndaǵy urpaqtaryna qatysty jańa derekter joldasańyz, ol da qundy qazyna bolar edi.
Baıqaý sharttary:
• Baıqaýǵa Abaı ómiri men shyǵarmashylyǵyna arnalǵan barlyq janrdaǵy (Esse, maqala, estelik, zertteý, suhbat, áserli áńgimeler t.b) shyǵarmalar qabyldanady.
• Shyǵarmashylyq jumystar Microsoft Word túrinde joldanýy qajet. Maqala kólemi 14 shrıftpen, 1,0 ıntervalmen, 2-2,5 betten aspaýy kerek.
• Bir qatysýshy bir ǵana materıal jibere alady. Shyǵarmalar qazaq tilinde qabyldanady.
• Baıqaýǵa 18 ben 40 jas aralyǵyndaǵy Qazaqstan turǵyndary qatysa alady.
• Báıgege qatysýshylar jumystaryna tolyq aty-jónin, telefon nómirin, meken-jaıyn jáne ózderi týraly qysqasha málimet qosyp, munara@muftyat.kz Elektrondy poshtasyna joldaýy qajet.
Baıqaý talaptary:
• «Munara» gazetiniń «Abaı sózi – urpaq temirqazyǵy» atty shyǵarmashylyq baıqaýyna» degen belgimen qabyldanady.
• Shyǵarmashylyq jumystardy qabyldaý 2020 jyldyń 15 aqpanynda bastalyp 2020 jyldyń 25 maýsymynda saǵat 18.00-de (Nur-Sultan ýaqyty boıynsha) aıaqtalady.
• Abaı shyǵarmashylyǵyna múldem qatysy joq, elimizdi, tilimizdi, dinimizdi mansuqtaıtyn materıaldar qabyldanbaıdy.
• Shyǵarmalardyń mazmundy, kórkem, sapaly obektıvti, kreatıvti jáne ózekti bolýyna asa mán beriledi.
Baıqaý barysy:
• Shyǵarmalardyń ishindegi talapqa saı, mazmundy ári qyzyqty jazylǵandary «Munara» gazetinde jarııalanyp otyrady.
• Baıqaý jeńimpazdaryn kásibı jýrnalısterden jáne din mamandarynan jasaqtalǵan qazylar alqasy anyqtaıdy.
• Jeńimpazdar 2020 jyldyń maýsym-shilde aılarynda (naqtyraq ýaǵynda habarlanady) ótetin keshte marapattalady.
Júlde qory:
Birinshi oryn – Umra qajylyǵyna joldama.
Ekinshi oryn – 200 myń teńge.
Úshinshi oryn – 100 myń teńge.
Budan bólek 5 adamǵa aqshalaı yntalandyrý syılyǵy beriledi.
Uıymdastyrýshylar: Qazaqstan musylmandary dinı basqarmasy men «Munara» gazetiniń redaktsııasy.
Redaktsııanyń meken-jaıy: Nur-Sultan qalasy, R.Qoshqarbaev kóshesi, 33/1