Múftııattyń «Munara» gazeti shyqty (FOTO)

Elordada Qazaqstan musylmandary dinı basqarmasynyń tól basylymy – «Munara» gazetiniń tusaýkeser rásimi ótti. Sharaǵa Bas múftı Serikbaı qajy Oraz, birinshi naıb múftı, Nur-Sultan qalasynyń bas ımamy Naýryzbaı qajy Taǵanuly, naıb múftı Ershat Ońǵarov, QMDB Apparat basshysy Ǵylymbek Májıev, múftııat qyzmetkerleri qatysty.  

«Ras, búginde adamnyń oı-pikirin bir arnaǵa burýda buqaralyq aqparat quralynyń mańyzy artyp keledi. Óıtkeni, bolǵan oqıǵaǵa árkim ár rakýrstan qaraıdy. Ony óz deńgeıinde qorytyp, saraptaıdy.

«Munara» obektıvti aqparat taratýmen qatar, salt-dástúr, tarıh, bilim, medıtsına, t.b. salalar boıynsha ǵalymdardyń izdenisterin, zertteý maqalalaryn turaqty túrde jarııalaıdy. Óıtkeni, Islam qulshylyq pen tirshilikti úılestire otyryp ómir súrýge úndeıdi.

Biz ıman uǵymyn «uıat bolady, obal bolady, saýap bolady» degen biraýyz sózge syıdyra bilgen halyqpyz. Islam qundylyqtaryn qazaqy tanym-túsinik aıasynda nasıhattaý, birlik pen izgilikti tý etetin, eldiń erteńine eleńdeıtin er-azamattardyń patrıottyq sezimin oıatý – «Munaranyń» basty muraty», – dep atap ótti Serikbaı Satybaldyuly.

«Munara» – QMDB-nyń resmı rýhanı-tanymdyq gazeti. Menshik ıesi – «Múftııat baspasy» JShS. Dırektory – Murat Manapuly. Bas redaktory – Serikbol Hasan, shef redaktory – Aǵabek Qonarbaıuly, al sharıǵı redaktory – Hasan Amanqul.

Gazet aıyna eki ret shyǵyp, 25 myń taralymmen taraıdy.