Mýftııat: qanypezer qaraqshylyq pen qan tógýdi qatań aıyptaıdy
Denıs Ten bizdiń elimizdiń maqtanyshy, betke ustar sport sheberi bolatyn.
Qazaqstan musylmandary dinı basqarmasy Denıstiń týǵan-týystary men jaqyndaryna kóńil aıta otyryp, bolǵan oqıǵaǵa sabyr tileımiz, qaıǵysyna ortaqpyz.
Bul oqıǵa – qanysherlik is ári jabaıylyqtyń, qaraqshylyqtyń kórinisi. Islam dini – qaraqshylyqpen aınalysyp adam qanyn tógýdi aıyptaıdy jáne birde-bir adamdy jazyqsyz óltirýge jol bermeıdi. Tipti, sol arqyly kúlli adamzatty qutqarý qajet bolsa da. Sondyqtan da, bir adamnyń qanyn tógý barsha adamzatty óltirgenmen teń. Alla Taǵala qasıetti Quran Kárimde qan tógýshilikti aıyptaı otyryp:
«Kimde-kim kisi óltirmegen nemese jer betinde búlik shyǵaryp, buzaqylyq jasamaǵan beıkúná jandy naqaqtan-naqaq óltirse, búkil adamzatty óltirgendeı bolady», – deıdi. («ál-Máıda» súresi, 32-aıat)
Sonymen qatar, ımam Múslim, Nasaı jáne Tırmızı sekildi ǵalymdardyń hadıster jınaǵynda kelgendeı Alla elshisi (Oǵan Allanyń ıgiligi men sálemi bolsyn):
«Alla úshin bir adamdy ólimge buıyrýǵa qaraǵanda búkil álemdi joq etý álde qaıda jeńil», – deıdi.
Iaǵnı, Allanyń quzyrynda árbir adam balasynyń qadir-qasıeti bar. Mine, Jaratýshynyń aldynda qadiri bar adamnyń qanyn tókkeni úshin qylmyskerler zań boıynsha qatań túrde jazalanýy qajet. Alla Taǵala Quranda:
«Qaraqshylyqpen aınalysyp jer betinde búlik shyǵaryp, buzaqylyq jasaǵandarǵa beriletin jaza – ...olardyń dúnıede kóretini qorlyq. Al, aqyrette olar úshin jan tózgisiz azap bar», – degen.
Aıattyń maǵynasyna úńiler bolsaq, Alla Taǵalanyń Ózi qurmetke bólegen adam balasynyń jazyqsyz ólimi úshin dúnıede qorlyqqa ushyratyp, aqyrette qatań jaza beretindigi eskertilýde. Sebebi, mundaı soraqy qylmys tek qana qatygez qylmyskerdiń ǵana isi.
