MÚFTIIaT ALMATYDA AÝYZAShAR BERDI
Almaty qalasynda Qazaqstan musylmandary dinı basqarmasynyń uıymdastyrýymen «Ramazan – izgilik aıy» rýhanı aýyzashar sharasy ótti. Is-sharaǵa zııaly qaýym ókilderi, múftııat janyndaǵy Aqsaqaldar, Sarapshylar men Jastar keńesiniń músheleri, buqaralyq aqparat quraldary qyzmetkerleri, sondaı-aq qarttar úıindegi qarııalar men balalar úıiniń tárbıelenýshileri qatysty.
Jıyn barysynda QMDB Tóraǵasy, Bas múftı Naýryzbaı qajy Taǵanuly jınalǵan qaýymdy qasıetti Ramazan aıymen quttyqtap, múbárak aıdyń rýhanı mańyzyna toqtaldy.
«Ramazan – júrekti tárbıeleıtin, adamdy sabyr men meıirimge úndeıtin aı. Bul aıda musylman balasy tek aýyz bekitip qana qoımaı, júregin tazartýǵa, jaqsylyq jasaýǵa, muqtaj jandarǵa qol ushyn berýge umtylady. Osyndaı rýhanı basqosýlar halqymyzdyń birligi men baýyrmaldyǵyn nyǵaıta túsedi.
Qasıetti Ramazan aıynyń eń qadirli kezeńi – onyń sońǵy on kúni. Paıǵambarymyz Muhammed (oǵan Allanyń salaýaty men sálemi bolsyn) osy kúnderi qulshylyǵyn erekshe arttyryp, Qadir túnin sońǵy on túnniń taq túnderinen izdeýdi ósıet etken.
Qasıetti Quranda: «Qadir túni – myń aıdan da qaıyrly» dep aıtylǵan. Iaǵnı bul túnde jasalǵan bir izgi amaldyń saýaby myń aı boıy jasalǵan qulshylyqtan da artyq bolady.
Búgin biz de sol berekeli kezeńge aıaq basyp kelemiz.Sondyqtan Ramazannyń sońǵy on kúnin múmkindiginshe qulshylyqpen ótkizip, duǵa-tilekti kóbeıtip, júrekterimizdi jaqsylyqqa buraıyq. Óıtkeni Qadir túni – Allanyń raqymy tógiletin, duǵalar qabyl bolatyn erekshe tún», – dedi Bas múftı.
Aýyzashar kezinde jas ánshi Jarashan Tólebaı «Meıirimdi Alla» ıláhı ánin oryndap, «Ágýgaı» ansambli dástúrli jarapazan jyryn aıtty.
Jıyn barysynda Qazaqstan Jazýshylar odaǵynyń basqarma tóraǵasy Mereke Ábdeshuly Qulkenov, «Nur-Múbárak» Egıpet ıslam mádenıeti ýnıversıtetiniń rektory, professor Ahmed Hýseın Muhammad Ibrahım, Qazaqstannyń halyq jazýshysy, belgili memleket jáne qoǵam qaıratkeri Nurlan Orazalın myrzalar quttyqtaý sóz sóılep, qasıetti Ramazan aıynyń qoǵamdaǵy rýhanı qundylyqtardy nyǵaıtýdaǵy mańyzyna toqtaldy.
Kesh sońynda aýyzashar qonaqtaryna Ramazan syılyǵy tabys etildi, odan bólek qarttar úıinen kelgen qarııalar men balalar úıiniń tárbıelenýshilerine arnaıy syı-sııapat jasaldy.
