Mınıstr: «Munara» jaqsylyqtyń jarshysyna aınalsyn!

 Adamzatty izgilik pen birlikke bastaýshy – ónegeli sóz bolsa, ony halyq nazaryna jetkizýshi – gazet. Jazýshy Sherhan Murtazanyń: «Otandy, ultty, ádebıetti, onyń bolashaǵyn súıý úshin kóp aıqaıdyń keregi joq. Tynymsyz, janashyr, tabandy áreket qajet», – degen sózi bar.  

Jastarymyzdy otansúıgishtikke, izgilikke, adamgershilikke tárbıeleıtin birden-bir utymdy qural da gazet. Rasynda, keıbir óskeleń urpaqtyń Islam dini týraly durys emes aqparatpen sýsyndaýy olardyń teris dinı aǵymdardyń arbaýynda ketýine negizgi sebep bolýda.

Sondyqtan rýhanı qundylyqtarymyzdy nasıhattaý jolyndaǵy jumysty bir sátke de toqtatpaýymyz qajet. Osy jumysqa Qazaqstan musylmandary dinı basqarmasy tarapynan shyǵyp jatqan «Munara» gazeti súbeli úles qosady degen senimdemin. Bul gazet dinı, rýhanı saladaǵy jetekshi basylymdardyń biri bolýy tıis.

Gazette salt-dástúr men tarıhı tanymdyq maqalalarǵa oryn beriletini qýantady. Bizdiń dástúrimiz ben tarıhymyz tuńǵıyq tárbıe bulaǵy. Osy bulaqtan sýsyndap, tarıhtan tálim alǵan jastar ata dinin, san ǵasyrdan beri urpaqtan-urpaqqa jalǵasyp, sabaqtasyp kele jatqan salt-dástúrin ardaqtap, erekshe qurmetteıtin bolady.

Dinniń qulshylyqpen ǵana shektelmeıtindigin, onyń ózegi adamgershilik pen meıirimdilikte, birlik pen izgilikte, ǵylym men mádenıette, órkenıet pen kórkem minezde ekendigin qalyń buqaraǵa, ásirese jastarǵa, kóbirek túsindirýimiz kerek. Jańadan ashylǵan «Munara» gazeti osy baǵytta qyzmet etedi dep oılaımyn.

Izgi isterińizge – sáttilik, basylym ujymyna shyǵarmashylyq tabys tileımin. «Munara» jaqsylyqtyń jarshysyna aınalsyn!

Qurmetpen,Dáýren ABAEV,
QR Aqparat jáne qoǵamdyq damý mınıstri