Meshit bas ımamy jamaǵatqa alǵys aıtty (foto)
Shýaqty kóktemniń alǵashqy merekesi «Alǵys aıtý kúnine» oraı izgi shara uıymdastyrý – elordadaǵy «Sádýaqas qajy Ǵylmanı» meshitindegi dástúrge aınalǵan.
Ardaqty Paıǵambarymyz (oǵan Allanyń salaýaty men sálemi bolsyn) múbarak mátindi hadısteriniń birinde: «Adamǵa alǵys aıta almaǵan, Allaǵa shúkir ete almaıdy», – degen eken. Endeshe, oraıly sátte meshit ómirinde mańyzy aıryqsha jandarǵa nege alǵys aıtpasqa. Meshit úshin berekeniń uıytqysy, din men dástúr sabaqtastyǵyn saqtaýda úlgi bolǵan aqsaqaldar ınstıtýtynyń, Analar mektebiniń róli aıryqsha.
«Alǵys aıtý kúnine» oraı «Sádýaqas qajy Ǵylmanı» meshitiniń bas ımam Rýslan Baızaqov jas býynǵa úlgi, ónege kórsetken aqsaqaldar men aq samaıly analarǵa alǵys aıtyp, meshit atynan syı-syıapat tabystady.
Quttyqtaý sózinde bas ımam Rýslan Baızaqov alǵys aıtýdyń mán-mańyzyna toqtalyp, meshittiń ystyǵyna kúıip, sýyǵyna tońyp, bereke-birlikke umtylǵan meshit jamaǵatyna aıyryqsha alǵys aıtty.
Sonymen birge, meshitte uzaq jyldan beri qyzmet jasap kele jatqan naıb ımam Rahmetýlla Orazǵa jáne meshittiń sharýashylyq qyzmetkerlerine arnaıy alǵys bildirdi.
