Mektep bitirýshi túlekter meshitke kelip, úlkenderdiń batasyn aldy (FOTO+VIDEO)

Búgin Elordamyzdaǵy mektep bitirýshi túlekterge arnalyp respýblıkalyq «Áziret Sultan» meshitinde «Jolyń bolsyn, jas túlek!» atty rýhanı shara bolyp ótti. Birer kúnnen soń mektep qabyrǵasynan túlep ushyp, úlken ómirge qadam basqaly turǵan jas jetkinshekterdiń jigerin janyp, rýhanı qoldaý kórsetýge baǵyttalǵan bul sharaǵa Elorda mektepteriniń 2000-nan astam oqýshysy jınaldy.

Qazaqstan musylmandary dinı basqarmasynyń Nur-Sultan qalasy ókildiginiń uıymdastyrýymen ótken shara barysynda shákirtter QMDB tóraǵasynyń birinshi orynbasary, naıb múftı Naýryzbaı qajy Taǵanuly, Memleket jáne qoǵam qaıratkeri Myrzataı Joldasbekov, Nur-Sultan qalasy qoǵamdyq damý isteri basqarmasynyń basshysy Danııar Esın, belgili aqyn, «Shalqar» radıosynyń dırektory Qalqaman Sarın bastaǵan bastaǵan el aǵalarymen júzdesip, nasıhatyna qanyqty. Jas túlekterge ómirlik tájirıbelerin aıtyp, aqyl-keńesterimen bólisken el aǵalary úlken ómirdiń alǵashqy synaǵynan súrinbeı ótip, bilim kóginde erkin samǵaýlaryna sáttilik tilep, aq tilek-batalarymen qýattandyrdy.

Shara aıasynda altyn uıa mektebin artqa qaldyryp, synaǵy mol kezeń aldynda turǵan túlekterge rýhanı qoldaý kórsetip, qıyndyqqa qarsy turyp, sátsizdikter men qatelikterge kúırep túspeı, sabyrlyqqa úıretý maqsatynda túlekterge arnaıy búktemeler taratyldy.

Sýretterdi «FOTOGALEREIa» aıdarynan kóre alasyzdar!