Medrese-kolledjderde qabyldaý emtıhany bastaldy

QMDB-ǵa qarasty «Saryaǵash» jáne «Úshqońyr» medrese-kolledjderinde 2020-2021 jańa oqý jylyna qabyldaý emtıhany bastaldy.

Elimizde qalyptasqan Epıdemıologııalyq jaǵdaıǵa baılanysty negizgi, jalpy orta jáne tehnıkalyq-kásiptik bilim negizinde «Islamtaný» mamandyǵynyń «Imam-hatıb» jáne «Islam negiziniń muǵalimi» biliktilikterine qujat tapsyrǵan talapkerlermen onlaın suhbattasý ótti.

Suhbat barysynda Bas múftıdiń keńesshisi Baltabaı Mekejanovtyń tóraǵalyǵymen quramyna QMDB Dinı bilim jəne kadr daıyndaý bóliminiń meńgerýshisi Smaıyl Seıtbekov, sonymen qatar medrese-kolledjderdiń arnaıy pən oqytýshylary engen komıssııa talapkerlerdiń jalpy bilim deńgeıin, dinı kózqarasyn, tańdaǵan mamandyqqa qyzyǵýshylyǵy men ıkemdiligin anyqtady.

Bıyl karantın shekteýlerine qaramastan, respýblıkanyń ár óńirinen medrese-kolledjderge qujat tapsyrýshylar sany kóp boldy. «Imam-hatıb» jáne «Islam negiziniń muǵalimi» biliktiligine bir orynǵa 4-5 talapker baq synady. Bul dinı oqý oryndarynyń arnaıy mamandar daıyndaýdaǵy deńgeıi men talapkerlerdiń dinı bilimge degen umtylysynyń óskenin baıqatyp otyr.

Negizgi jáne jalpy orta bilim boıynsha «Islamtaný» mamandyǵyna suhbattar Bilim jáne ǵylym mınıstrliginiń erejelerine saı ashyq jaǵdaıda ótti.