«Máýlit syılyǵynyń» ıegerleri marapattaldy (FOTO)
Elordada ótken «Ǵalamnyń raqym nury» atty rýhanı keshte dástúrli «Máýlit syılyǵy» tabystalǵan bolatyn. Sahna tórine kóterilgen QMDB tóraǵasy, bas múftı Serikbaı qajy Oraz, naıb múftı, Nur-Sultan qalasynyń bas ımamy Naýryzbaı qajy Taǵanuly men bir top qoǵam qaıratkerleri «Rýhanı jeti qazyq» tuǵyrnamasy boıynsha jeti adamdy marapattady.
«Mádenıettilik» atylymy boıynsha qazaq halqynyń ulttyq ónerin, qolóner buıymdaryn qaıta jańǵyrtyp, ulttyq mádenıetimizdi sheteldik kórmelerde pash etip júrgen zerger, Qazaqstannyń eńbek sińirgen qaıratkeri, halyqaralyq Karl Faberje ordeniniń ıegeri Berik Álibaı marapattalsa, Nur-Sultan qalasyndaǵy «Zerde» mektebiniń 10-synyp oqýshysy Temirlan Rahımbaev «Bilimdilik» atalymy boıynsha marapattaldy. Ol jaqynda ǵana Qytaı elinde ótken halyqaralyq «CASTIC 2019» olımpıadasynda II oryn alyp keldi.
Osydan 5 aı buryn Nur-Sultan qalasynda bolǵan órt kezinde qaýip-qaterge qaramastan, tórtinshi qabatqa órmelep shyǵyp, úsh sábıdi qutqaryp qalǵan Eýrazııa Ulttyq ýnıversıtetiniń 3-kýrs stýdenti Nursultan Smaǵulovqa «Otanshyldyq» atalymy boıynsha marapat buıyrsa, «Eńbekqorlyq» atalymy boıynsha arnaıy syılyqqa zaǵıp ta bolsa, taǵdyrdyń synaǵyna mújilmeı, jastaıynan sportpen shuǵyldanyp, búginde bıik dárejelerge jetken dzıýdodan Halyqaralyq dárejedegi sport sheberi Erǵalı Shameı laıyq dep tanyldy.
«Imandylyq» atalymy boıynsha sanaly ǵumyryn asyl dinimizdi nasıhattaý jolynda qaltqysyz qyzmet atqaryp, shákirt tárbıelep, kitap aýdaryp, ıslam tarıhyn, sahabalar ómirin qazaq jurtshylyǵyna keńinen tanystyra bilgen ulaǵatty ustaz – Abdýlla Joldasuly men «Aýyzbirshilik» atalymy boıynsha Soltústik Qazaqstan oblysy, Taıynsha aýdany, Teńdik aýylynyń qurmetti qarııasy, abyz aqsaqal – Orynbaı qajy Shaıhanulyna shıpajaıǵa joldama berildi. 2001 jyly óz qarjysyna týǵan aýylyna meshit turǵyzǵan Orynbaı aqsaqal sol jyldary Dinı basqarma úndeýine úles qosyp, qasıetti Ramazan aıynan keıin aýylda araq-sharap satqyzbaýǵa ýaǵdalasqan. Sol ýaqyttan beri Teńdik aýylynda ishimdik satylmaýyna muryndyq bolǵan aqsaqaldyń marapatyn kópshilik aldynda balasy saltanatty túrde qabyl aldy.
«Máýlit syılyǵynyń» sońǵy ıegeri, kir shalmaǵan aq jaýlyǵy sekildi adaldyǵyna shań jýytpaǵan 93 jastaǵy elanasy Fatıma Ábdibekqyzy «Amanatshyldyq» atalymy boıynsha marapattaldy. Osydan birer jyl buryn eldi eleń etkizgen jańalyq – ardaqty Paıǵambarymyzdyń bir tal saqal shárıfi qazaq jerinde tabylyp el eńsesin kótergen edi. Alla elshisiniń (s.ǵ.s.) bir tal saqaly salynǵan kapsýlany bekitken qutynyń aýzyndaǵy mór men ony saqtap kelgen osy kúnge deıingi sandyqshanyń móri jáne sol kezdegi Osman memleketiniń resmı qaǵazdarynyń barlyǵy ras ekendigi anyqtalǵan. Marapat ıelerine arnaıy alǵys hat pen baǵaly syılyqtar, shıpajaılarǵa joldama berildi.
(Orynbaı Áljanovtyń syrqattanyp qalýyna oraı sahnaǵa uly Shoqan Áljanov kóterildi)
