Mańǵystaýǵa jańa ókil ımam taǵaıyndaldy (FOTO)

Mańǵystaýǵa arnaıy jumys saparymen kelgen QMDB tóraǵasynyń birinshi orynbasary, naıb múftı Naýryzbaı kajy Taǵanuly juma kúni Mańǵystaý oblystyq ortalyq meshitinde «Taqýalyq» týrasynda juma ýaǵyzyn aıtyp, Bas múftıdiń sálemin jetkizdi. Bas múftı Serikbaı qajy Satybaldyulynyń buıryǵymen QMDB-nyń Mańǵystaý oblysy boıynsha ókil ımamy, Mańǵystaý oblystyq ortalyq meshitiniń bas ımamy, Aqtaý qaıyrymdylyq jeke mekemesiniń dırektory qyzmetin atqaryp kelgen Smaıyl Súıerqululy Seıtbekovtiń atalmysh qyzmetinen bosatylyp, Qazaqstan musylmandary dinı basqarmasy «Halal ónimderin standarttaý» bólimine meńgerýshi bolyp taǵaıyndalǵanyn aıtyp, buıryqpen tanystyrdy.

Alty jylǵa jýyq qyzmet etken, birneshe kitaptardyń  avtory, Ǵulamalar keńesiniń múshesi S.Seıtbekovke Naýryzbaı qajy Taǵanuly Bas múftıdiń alǵys hatyn tabystap, qazaqy dástúrmen ıyǵyna shapan jaýyp, jańa qyzmetine sáttilik tiledi. Alty jyldaı oblystyq meshitte abyroımen qyzmet atqarǵan ókil ımam Smaıyl qajy Súıerqululyna júktelgen mindetti abyroıly atqarǵany úshin, meshit jamaǵatymen qoıan-qoltyq aralasyp, kóptegen shákirt daıyndap, óz qyzmetin jaýapkershilikpen atqarǵandyqtan meshittiń kásipker jamaǵattary temir tulpardyń kiltin syıǵa tartý etti. Meshit aqsaqaldary atynan sóz alǵan Baqytjan Ilıasov aǵa da bas ımamnyń ıyǵyna shapan jaýyp, at mingizdi. Smaıyl Seıtbekov sóz alyp, barsha jamaǵatqa rızashylyǵyn bildirdi. 

Naıb múftı Naýryzbaı qajy Taǵanuly Bas múftı buıryǵymen QMDB-nyń Mańǵystaý oblysy boıynsha ókil ımamy, Mańǵystaý oblystyq ortalyq meshitiniń jańadan taǵaıyndalǵan bas ımamy Ánýar Izimbaıuly Eljanovty jamaǵatqa tanystyryp, aldaǵy qyzmetine tabys tiledi.

Naıb múftı Naýryzbaı qajy Taǵanuly juma namazyn júrgizip, namazdan keıin jamaǵatqa bata berdi. Meshit jamaǵattary namazdan keıin Smaıyl Seıtbekovke sáttilik tilep, batalaryn berip tarqasty.

Eljanov Anýar Izimbaıuly

03.01.1979 jyly Túrkistan oblysy Jetisaı aýdany Atameken aýylynda dúnıege kelgen.

2000-2004  jyldary Shymkent qalasy « Ótes batyr» atyndaǵy medreseniń «Islamtanýshy, ımam hatıb» mamandyǵyn bitirgen.

2007-2011 jyldary  Almaty qalasy «Nur-Múbárák Egıpet ıslam mádenıeti» ýnıversıtetin bitirgen.

2010 jyly  Mysyr Arab respýblıkasy Aleksandrııa qalasy «Ábý Bákir syddyq» atyndaǵy arab tilin damytý ortalyǵynda eki aı  bilim alǵan.

2012-2014 Almaty qalasy «Nur-Múbárák Egıpet  ıslam mádenıeti» ýnıversıteti magıstr dárejesin alǵan.

2013 jyly  Mysyr Arab respýblıkasy Kaır qalasy «Nil» arab tilin damytý ortalyǵynda 6-aı  bilimin jetildirgen.

2013  jyly Malaızııa memleketi  Kýala Terrıngano qalasy «Sultan Záınal Ábıdın» atyndaǵy ıslam ýnıversıtetinde bir aı  bilim alǵan.

2004-2006  jyldary Túrkistan oblysy Shardara aýdany  Qazaqstan aýyly «Sary-Amangeldi» meshitiniń bas moldasy qyzmetin atqarǵan.

2006-2014 jyldary  Almaty qalasy «Zarıa vostoka» meshitiniń bas ımamynyń mindetin atqarýshy bolyp qyzmet etken.

2014-2015  Almaty qalasy Medeý aýdany «Arafat» meshitiniń bas ımamy qyzmetin atqarǵan.

2015-2017 QMDB  Halal Damý JShS Almaty qalasy boıynsha jaýapty ókili.

2017-2019 QMDB  Halal Damý JShS dırektor orynbasary.

2019 jyldan bastap QMDB  Halal Damý JShS dırektory qyzmetin atqarǵan.

Otbasyly, 4 balasy bar.