Mańǵystaýda jańa meshittiń irgetasy qalandy

Mańǵystaý oblysy, Munaıly aýdany, Dáýlet aýylynda jańa meshittiń irgetasy qalandy. Bul kúndi on myń adamdyq aýyl turǵyndary kópten kútken edi.

Jańa meshittiń alǵashqy irgetasyn qalaý rásimine Munaıly aýdany ákiminiń orynbasary Beıimbet Abdyqadiruly, Munaıly aýdanynyń maslıhat hatshysy Berdibek Izetuly, Mańǵystaý oblysy boıynsha ókil ımamy Smaıyl Seıtbekov jáne aýyl turǵyndary qatysty.

Meshittiń salynýyna demeýshilik jasap  otyrǵan aýdan turǵyny, jeke kásipker Hasnııazov Jaqsykeldiniń aıtýynsha bir ýaqytta 500 adam qulshylyq ete alatyn, zaman talabyna saı meshit salý josparlanýda.

Meshittiń alǵashqy irgetasyn aýyl aqsaqaldary qalap, ókil ımam Smaıyl Seıtbekov te jalǵastyrdy. Dáýlet aýylynda jańadan qolǵa alynǵan saıabaqqa  tal egip, jastarǵa úlgi bolarlyq is kórsetti.

Ókil ımam S.Seıtbekov «Kimde kim Allanyń razylyǵyn kózdep jer betinde meshit salsa, Allah Taǵala oǵan jumaqtan bir úı salady» degen hadısti aıta kele Quranda Alla Taǵala bylaı degen:  «Alla Taǵalanyń meshitterin tek Allaǵa jáne aqyret kúnine ıman etkender ǵana salady» dep meshit salýdyń úlken saýap ekenin jetkizdi.