Mańǵystaý: Ulyq aıda 10 myńnan astam otbasyna kómek berildi
Qazaqstan Musylmandary Dinı Basqarmasy Mańǵystaý ortalyq Beket ata meshitinde ımamdar men meshit qyzmetkerleriniń basqosýy bolyp ótti. Oblysymyzdyń bas ımamy Ánýar Eljanov elimizde jarııalanǵan tótenshe jaǵdaıǵa dóp kelgen ramazan aıynda atqarylǵan isterdi qorytyndylady.
Karantın kezinde oblys meshitteriniń esikteri jabyq bolǵanymen, saýap esikteri ashylyp, birqatar qaıyrymdylyq sharalary uıymdastyryldy. Meshit qyzmetkerleri úıde jumys isteý tártibine kóshirilse de, is-sharalarǵa belsene atsalysqan. Ánýar Izimbaıuly óz isine adaldyqpen qarap, asyl dinimiz jolynda aıanbaı ter tógip júrgen meshit qyzmetkerlerine alǵys aıtty.
- Bıylǵy jylǵy ramazan burynǵylardan ózgerek boldy. Karantın Allaǵa degen qulshylyǵymyzdy kúsheıtpese, álsiretken joq. Mańǵystaý oblystyq meshitinde úsh qarı kún saıyn Quran hatymnan bir para oqyp, ınstagram paraqshasynda úsh qarı úsh hatym túsirdi. Sonymen qatar, meshittiń turaqty jamaǵattary úılerinde otyryp, bir kúnde birneshe ret Quran hatym oqyp, shákirtterdiń biri ramazan aıynda tolyqtaı 80 ret Quran hatym shyǵarǵan. Kóptegen shákirtter ara qashyqtyqta jattaǵan súrelerin ustazdaryna tapsyrdy. Oblys meshitterinde tirkelgen muqtaj otbasylarǵa kómek kórsetilip, azyq-túlik taratyldy. Orta eseppen 5 myńnan astam az qamtylǵan otbasyna kúndelikti tutynatyn azyq-túlik jetkizildi, - deıdi QMDB-nyń Mańǵystaý oblysyndaǵy bas ımamy Ánýar Eljanov.
Qasıetti aıda meıirimdilik kórsetip, jomarttyq tanytqan jergilikti kásipkerler az bolmaǵan. Al, meshit qyzmetkerleri men eriktiler turǵyndarmen tyǵyz baılanys ornatyp, kómekti úıdi-úıge jetkizgen. Óńirimizdiń bas ımamy birqatar qyzmetkerlerdiń eren eńbegin atap ótip, marapattady. Osy oraıda, ımamdar atqarylyp jatqan jumystardy aıtyp, aldaǵy josparlarymen bólisti. Utymdy usynystardy alǵa tartqandar da boldy.
- Oblys meshitterinde tirkelgen otbasylardyń ortaq bazasyn jasaqtaý kerek. Muqtaj jandardyń jalpy tizimin jasap, qaıyrymdylyq sharalaryn júıeli túrde uıymdastyrý kerek. Qazir barlyq meshitterdiń qaıyrymdylyqqa jaýapty jetekshilerin bir topqa biriktirý qolǵa alynýda, - deıdi Aqtaý qalalyq Beket ata meshitiniń naıb ımamy Izdibaı Qoblanov.
Oblys meshitterinde tótenshe jaǵdaıda ótken oraza kezinde namaz oqylmasa da, jamaǵatpen onlaın baılanys ornatylyp, qadirli aıdyń qadir-qasıeti, jalpy asyl dinimizdegi saýap men paryz, ımandylyq men meıirimdilik qaǵıdattary aıtyldy. Telefon baılanysy
jáne áleýmettik jeliler arqyly kelgen ramazan aıy jaıyndaǵy barlyq suraqtarǵa jaýap berilip, túsinik jumystary úzdiksiz júrgizildi. Imamdar turǵyndarǵa el basyna túsken synaqty sabyrlyqpen kóterip, karantın erejelerine baǵynyp, syn saǵattarda aýyzbirshilik pen shydamdylyqty saqtap, jalǵan málimetterge ermeı, qıyndyqtan birge ótýdiń mańyzdylyǵyn onlaın ýaǵyzdarda barynsha túsindirdi. Sondaı-aq, "Mańǵystaý", "Aqtaý" telearnalarynda "Ramazan ýaǵyzdary" jáne "Ramazan dáristeri" baǵdarlamalary júrgizilip, ımamdar qasıetti aıdyń qadir-qasıeti týraly tolyq maǵlumat berdi. Osy aıda 100 otbasynyń januıalyq máselege qatysty keńester berilip, áleýmettik jelilerde 3 myńdaı suraqqa jaýap berilgen.
Mańǵystaý oblysyndaǵy ortalyq, aýdandyq jáne qalalyq meshitteriniń jáne QMDB-nyń "Zeket korporatıv qory" Mańǵystaý ókildiginiń uıymdastyrýymen "Júrek jylýy" qaıyrymdylyq sharasy bolyp ótti. Shara aıasynda az qamtylǵan jáne muqtaj otbasylarǵa QMDB Tóraǵasy, Bas mýftı Naýryzbaı qajy Taǵanuly bastamasymen, Mańǵystaý oblysynyń ákimi Serikbaı Trumovtyń kásipkerlerge Úndeýimen, mańǵystaýlyq kásipkerlerdiń qarjysyna Qostanaı oblysynan aımaǵymyzǵa 1 vagon un alynyp, 1400 otbasyna joǵary sapaly 50 kelilik un úıdi-úıge taratyldy. Al, oblystyq Beket ata meshiti men "Ulttyq rýh" qorynyń uıymdastyrýymen, "Oraza tartýy" qaıyrymdylyq jobasynyń aıasynda ramazan aıynda 2500 otbasyna azyq-túlikpen kómek kórsetildi. Imamdar ıgi sharany dástúrge aınaldyryp, jyl saıyn qolǵa alýdy josparlap otyr.
Mańǵystaý ortalyq Beket ata meshiti men erikti jastardyń uıymdastyrýymen, eldegi juqpaly indetpen kúreste kásibı sheberlik pen shydamdylyqtyń úlgisin kórsetip, eren eńbek etip júrgen oblystyq juqpaly aýrýlar aýrýhanasynyń dárigerleri men Aqtaý kósheleriniń aınadaı taza bolýy úshin ter tógip júrgen tazalyq saqshylaryna ystyq as daıyndap, qıyn da jaýapty kezeńde talmaı eńbek etip júrgen mamandyq ıelerine joǵary kóńil kúı syılady.
Mańǵystaý oblystyq Beket ata meshitiniń janynan qurylǵan "Izgiler joly" eriktiler tobynyń uıymdastyrýymen "Jylý syıla" atty qaıyrymdylyq sharasy bolyp ótti. Eriktiler densaýlyǵyna baılanysty jarymjan atanǵan 100 jannyń úıine arnaıy baryp, azyq-túlik taratty. Aqtaý qalalyq Beket ata meshiti Allanyń razylyǵy úshin aýzyn bekitip, qasıetti aıda nıet etken otbasylarǵa aýyzashar taratty. Meshitte ystyq tamaq pen baýyrsaq pisirilip, táttiler men sýsyndar satyp alyndy. Aýyzashar qaltalary Aqtaýdaǵy 20 shaǵynaýdan turǵyndaryna jetkizildi.
Qazaqstan musylmandary dinı basqarmasy Mańǵystaý oblystyq ortalyq meshitiniń áıel-qyzdar sektorynyń uıymdastyrýymen Aqtaýdaǵy áleýmettik jatahanada turatyn 100 otbasyna aýyzashar taratyldy. Qaıyrymdylyq sharasyna meshit jamaǵaty atsalysyp, qasıetti aıda nıet etip, aýzyn bekitkenderge ystyq taǵam úılerine jetkizildi. Oraza-aıt merekesine oraı, 300-ge jýyq balalarǵa meshitter atynan syılyqtar úlestirildi. Imamdar Munaıly aýdanynda turatyn muqtaj otbasyny baspanamen qamtamasyz etti. Sondaı-aq, ramazan aıynda 10 otbasyna 10 qudyq qazylyp berildi. Oraza aıynda densaýlyǵy jarymjan bir janǵa estý quraly satyp alyndy. Kóz janary jaryq dúnıeni kóre almaı, jany jaralanǵan Darıǵa Daýylbaevaǵa meshit qyzmetkerleri qaıyrymdylyq uıymdastyryp, 8 mıllıon teńge qarajat jınap berdi. Endi Darıǵa Túrkııa eline baryp, kózine ota jasatady. Túrkistan oblysynyń Maqtaral aýdanynda bolǵan tótenshe jaǵdaıdy eńserý úshin óńirimizden 85 tonna júk jiberildi. Oblys meshitteri de bul sharaǵa belsendi atsalysyp, óz úlesterin qosty.
Elimizdiń Bas mýftıi Naýryzbaı qajy Taǵanulynyń oblysymyzǵa sapary barysynda Jańaózen qalasynda eki shákirtke joǵary oqý ornyna grant bólinip, muqtaj otbasyna jańa úı tapsyryldy. Al, Munaıly aýdanyndaǵy Mıǵraj meshitiniń janynan 8 páterlik úıdiń salynyp, meshit qyzmetkerleri baspanamen qamtyldy. Sondaı-aq, meshit janynan bastalǵan sport kesheniniń qurylysy támamdalýǵa jaqyn.
Jalpy qaıyrymdylyq sharalarynyń aıasynda oblys boıynsha 10 myńnan astam muqtaj otbasyna azyq-túlikpen kómek berilgen. Mańǵystaý ortalyq Beket ata meshiti, Aqtaý qalalyq Beket ata meshiti jáne Jańaózen qalalyq, Túpqaraǵan, Qaraqııa, Munaıly, Beıneý jáne Mańǵystaý aýdandyq meshitteriniń bas ımamdarynyń uıymdastyrýymen, meshit qyzmetkerleriniń birigýimen ótkizilgen bul sharalarǵa 30 mıllıon teńgege jýyq qarajat jumsalǵan.
Qazaqstan musylmandary dinı basqarmasynyń Mańǵystaý boıynsha oblystyq, qalalyq jáne aýdandyq meshitterdiń qyzmeti 2020 jylǵa bekitilgen is-sharalar josparynyń aıasynda júrgizilip jatyr. Meshitterdiń qyzmeti - ýaǵyz-nasıhat, qaıyrymdylyq sharalaryn ótkizý, dinı saýat ashý kýrstaryn jandandyrý, buqaralyq aqparat quraldarymen jumys, ımamdardyń bilimin jetildirý, oqý-aǵartý, dinı is-sharalar men dinı merekelerdi uıymdastyrý baǵytynda júredi. Jyldyń basynan beri ýaǵyz-nasıhat ótkizý, jamaǵattyń dinı saýat ashý kýrstaryna qatysýyn qamtamasyz etý jáne ımamdardyń bilimin jetildirý boıynsha sharalar josparǵa sáıkes júzege asyrylǵan. Kóktemgi mezgil bolǵandyqtan, aǵash, gúl otyrǵyzý jumystary qolǵa alyndy. Qazaqta «Atadan mal qalǵansha, tal qalsyn» degen sóz bar. Onyń ústine Mańǵystaý óńiri shóleıtti aımaq bolyp sanalatyndyqtan, oblys meshitteriniń aýlalaryna 500-ge tarta aǵash egilip, gúl kóshetteri otyrǵyzyldy.
Sońǵy ýaqytta ımamdar men din qyzmetkerleri áleýmettik jelige nazar aýdaryp, belsendilik tanytýda. Instagramm jáne feısbýk jelilerinde 100-den asa jarııalanym jaryq kórip, saıttar men gazet betterinde 60-tan asa maqala shyqqan.
