«Halal Damý» Halyqaralyq kongreske qatysty

Máskeý qalasynda Aýyl sharýashylyq mınıstrligi uıymdastyrǵan 27-shi halyqaralyq «PROD EXPO» kórmesi aıasynda Reseı Mýftıler Keńesine qarasty «Halyqaralyq halal standarttaý jáne sertıfıkattaý» ortalyǵynyń uıytqy bolýymen «H Halyqaralyq halal kongressi» ótti.

Atalǵan is-sharaǵa arnaıy shaqyrtý alǵan QMDB «Halal ónimderin standarttaý» bóliminiń meńgerýshisi Smaıyl Seıtbekov «Qazaqstandaǵy halal ındýstrııasy» taqyrybynda baıandama jasady. Baıandama barysynda «Halal damý» JShS-niń atqarǵan jumystaryna toqtaldy.

Sonymen qatar Belarýs, Qyrǵyzstan, Ózbekstan, Reseı eliniń halal standarttaý jáne sertıfıkattaý salasynyń mamandary da qatysyp, óz elderindegi halal salasynda atqarylǵan sharalar, tájirıbeler men jetistikteri jóninde qundy aqparattarymen bólisip, baıandama jasady.

Kongress sońynda «Eýrazııalyq Halal Odaǵynyń» tóraǵasy, «Halyqaralyq halal standarttaý jáne sertıfıkattaý» ortalyǵynyń bas dırektory A.Gazızov, RF MDB jáne Reseı Múftıler Keńesiniń birinshi orynbasary R.Abbıasov, RF Aýǵanstan elshisi Latıf Bahand jıynda sóz sóılegen spıkerler men «PROD EXPO» kórmesine qatysqan eń úzdik «Halal ónim» baıqaýynyń jeńimpazdaryna arnaıy sertıfıkat pen alǵys hat tabystady.

Halyqaralyq halal standarttaý jáne sertıfıkattaý» ortalyǵynyń bas dırektory A.Gazızov kongress sońynda kelgen qonaqtarǵa jáne halal standarty boıynsha qyzmet kórsetýshi mekeme basshylaryna alǵys hat berip, ıgi tilegin jetkizdi.