«Halal Damý» 20 kásipkerdi marapattady (FOTO)

QMDB halal ónimderin standarttaý bóliminiń meńgerýshisi Smaıl Seıtbek issapar barysynda Jambyl oblysynyń kásipkerlerimen kezdesti.

Kezdesýge Jambyl oblysynyń bas ımamy Qanat Jumaǵul jáne «Halal Damýdyń» jergilikti jaýapty ókili Nurmadjan Mırazızov qatysty.

Jıyn barysynda sóz alǵan S.Seıtbek kásipkerlerge: «El ıgiligi úshin halal ári taza ónim óndirý – saýapty hám jaýapty is. Osy jolda siz ben biz bar bilimimiz ben kúsh-qaıratymyzdy jumsap, aıanbaı eńbek etip kelemiz. Elimizdegi kúlli musylmanǵa, jalpy tutynýshylarǵa adal ónim usynýdyń jaýapkershiligi tym joǵary. Bul dúnıede de, aqyrette de suraýy men suraǵy qatal. Osy jolda atqarǵan tynymsyz eńbekterińiz ben halal ındýstrııasyn damytýǵa qosqan úlesterińizge rızashylyǵymyz ben alǵysymyzdy bildiremiz»,-deı kele «QMDB halal» standarty boıynsha jumys jasaıtyn 20 kásipkerdi alǵys hatpen marapattady.

Sonymen qatar, kezdesý barysynda kásipkerlerge arnalǵan oqý-semınar ótkizildi. «Halal Damýdyń» atqaratyn qyzmeti men mindeti, baǵyttary, sertıfıkattaý barysynda qoıylatyn basty talaptardyń ereksheligi, ónimderdi laboratorııalyq synaqtan ótkizýdiń tıimdiligi, baqylaý-qadaǵalaý jumystarynyń júrgizilýi, halal ónimder tehnologııasy boıynsha ónim óndirýdiń ereksheligi, sertıfıkattalǵan kásiporyndardyń qadaǵalalanýy, mekemelerdi nasıhattaý maqsatynda aqparattandyrý men halyqpen tyǵyz baılanysta jumys jasaýdyń mańyzdylyǵy túsindirildi.